Tlam lơ 24/5, ƀơi sang bruă kơnuk kơna, Khua dêh čar ơi Phạm Minh Chính tŭ jum ơi Karan Adani, Khua phun kông ty tơdrun kompan hăng anih bơwih ƀong huă, gah Group Adani sa amăng hơdôm group bơwih ƀong huă prong hloh dêh čar India, hlăk kơsem min, ĕp lăng, anih či ngă hrom tuh pơ alin amăng Việt Nam. Ƀơi mông bưp, Khua dêh čar ơi Phạm Minh Chính bơni kơ ơi Karan Adani rai čuă Việt Nam; lăi pơtong Việt Nam lăng yôm bruă ngă giăng mah laih anun ngă hrom bơwih ƀong huă hăng dêh čar India; hok mơak ƀuh tơlơi ngă giăng mah, rô nao rai yôm hlom bom dua bơnah hlăk pơđĭ kyar hiam klă djop bruă.

Khua dêh čar lăi rơđah, bruă pơblih yua mrô, akŏ pơdong bơwih ƀong huă tui mrô, bruă wai lăng mơnuih mơnam yua mrô jing jơlan gah hrom amăng rŏng lŏn tơnah, Việt Nam ăt ƀu dŏ gah rơngiao jơlan gah anun lơi hăng čang rơmang Group Adani pok pơhư prong anih tuh pơ alin amăng bruă anai. Khua dêh čar lăi, Kơnuk kơna Việt Nam amra ngă gêh găl brơi Group Adani ăt rai kơsem min, ĕp lăng hơdôm kơčăo bruă prong pơkŏn ƀơi Việt Nam, laih dơ̆ng ba jơlan hlâo amăng bruă pơtrut lu ƀing ngă bruă sĭ mơdrô mơ̆ng India rai pơ Việt Nam bơwih ƀong huă.