Ƀơi mông bơkơtuai nao rai, ƀing pơ ala anom bruă mơdrô hăng khul grup ngă  hrŏm ASEAN lăng yom anih anom tuh pơ alin ƀơi Việt Nam, lăng anai jing anih či rai pơhưč pran jua biă mă; laih dơ̆ng rơkâo đĭ  tơlơi či kiăng pơdjơ̆ nao hơdră ngă hră pơar, duh jia, rơnoh yua apui hăng sĭ mơdrô tui jơlan điện tử. Khua mua hơdôm ding jum, anom bruă dêh čar Việt Nam hơmâo pơblang brơi rơđah hơdôm tơlơi pơgôp hiăp mơ̆ng ƀing ngă bruă mơdrô.

Pơhiăp đĭ ƀơi mông jơnum, Khua dêh čar lăi pơtong, tơlơi rô nao rai plah wah ASEAN hăng Việt Nam lĕ kơnôl brơi ƀuh bruă ngă hơdai gum hrŏm amăng kual tŭ yua. Việt Nam lăng kơ ASEAN lĕ tơlơi đing nao hlâo hloh hăng yom biă mă laih anun ƀuăn akŏ pơdong khul gum hrŏm ASEAN kơjăp kơtang. Khua dêh čar čang rơmang djop sang bruă mơdrô ASEAN pok pơhư prong, kơtưn tuh pơ alin sĭ mơdrô, pơjao nao rai boh thâo phrâo ia rơgơi, pơgôp hiăp kiăng ngă giong tơlơi phiăn pơkă, ngă gêh găl brơi bruă pơtô hrăm mơnuih mă bruă rơgơi kơhnâo, wai lăng tong ten, tŭ yua, gir run kiăng hơmâo lu kơčăo bruă ngă hrŏm bơwih ƀong huă djă jă gru kơnăl ngă giăng mah Việt Nam hăng hơdôm dêh čar ASEAN. Amăng anun, kiăng pơtrut pơtruh nao rai bơwih ƀong huă, pơđĭ kyar atur ba yua ia rơgơi mrô, apui yua hăng bruă ngă bong glăi anŏ pơblih ayuh hyiăng lŏn tơnah.