Đĭ pơhiăp git gai mông jơnum, Khua dêh čar lăi pơtong mơng akŏ pơjing khul git gai, bruă pok pơhai hơdôm akŏ bruă jơlan rơdêh treng hơmâo pơplih klă, pơhlôm djơ̆ abih bang hăng tŭ yua ƀiă. Khua dêh čar rơkâo djop ding jum, gơnong bruă, ƀon lan ngă tui pran gơgrong, thâo pơmĭn khin ngă, đing nao pơsir hĭ tơlơi gun kiăng pơđĭ kyar bruă pơkra jơlan rơdêh treng. Hăng ară jơlan Lào Cai-Hà Nội-Hải Phòng, kiăng pơtrut tañ pok pơhai hơdôm akŏ bruă phara, pơgiong hră lăi pơthâo kơsem min lăp djơ̆, pơtrut bruă tơkuh nao rai, man pơdong tơdrông tuai giăm guai hăng ngă tui klă bruă duh prăk pơhrui lŏn, man pơdong plơi pla phrâo.

Hăng ară jơlan rơdêh đuăi hmar Kơdư-Dơnung hăng hơdôm ară jơlan amăng ƀôn prong Hà Nội, Hồ Chí Minh hrŏm hăng sa, dua ară jơlan tơkuh nao rai kual. Khua dêh čar rơkâo man pơkra tui dưm dăp tong ten, ba tơbiă hơdră pơtrut tañ man pơkra, pơhlôm lăp djơ̆ hăng ha amăng plĕ.