Ƀơi mông ngă bruă, Khua git gai Ping gah lăi rơđah 6 mơta bruă prong, kiăng pơsit djơ̆, lăng bruă anai jing gru phun hăng tơlơi pơmin đĭ kyar sui thun. Tơlơi pơtrun khŏm jing hơdră ngă bruă čih pơkra abih bang kơ hơbô̆ bruă đĭ kyar 2 mrô mơ̆ng Việt Nam truh thun 2045, pơƀuh tơlơi gir ngă bruă akŏ phun hăng ruah mă anŏ lăp djơ̆ đah mơ̆ng dưi ngă tui tơlơi kơtưn đĭ kyar lŏn ia. Đĭ kyar khŏm pơhlom hơđong, klă, abih bang, hlom bom, mơtah hăng gơgrong mă pô.

Kiăng dưi đĭ kyar tañ hăng hơđong kjăp, kiăng lăng nao tơlơi pơplih amăng tơlơi pơmin đĭ kyar amăng abih bang anom bruă kơđi čar hăng mơnuih mơnam; lăng anai ƀu kơnong jing rơnoh pơkă bơwih ƀong đôč ôh ăt jing bruă kơđi čar akŏ phun, ječ ameč; lŏm hĭ tơlơi pơmin ngă kiăng hơđong, găp lăp, tơlơi pơmin ngă tui rơwang bruă, ngă bruă ƀơi anih anet; pơtrut tui pran jua khin pơmin khin ngă, gơgrong bruă, ngă bruă abih bang bơkơnar; jao bruă rơđah rơđông, ngă hrŏm kjăp plah wah Gơnong dlông, tơring čar hăng anom bơwih ƀong; mă boh thâo ia rơgơi, pơčeh phrâo, mă yua boh thâo mrô pơtrut pơsur hơbô̆ bruă đĭ kyar phrâo.