Hăng guai ia rơsĭ glông rơbêh 189km, Dak Lăk hơmâo hơdôm rơtuh boh ƀat tô song nao pơ ia rơsĭ nao mă akan hăng rông akan hơdang. Gum hrŏm hăng neh met wa mă akan, khua mua, ling tơhan pơgang guai gir dŏ hrŏm hăng ia rơsĭ, ngă klă bruă pơgang, pơhlom kjăp bruă dŏ gak, blah ngă; djru ba neh met wa nao mă akan hăng pơhlom hơđong, rơnuk rơnua ƀơi ia rơsĭ.

Ƀơi tơdrun ia Đông Tác, Thượng úy Phan Ngọc Dương, Khua anih wai pơgang Guai Đà Rằng, Puih kơđông tơhan pơgang guai Tuy Hòa brơi thâo: mơ̆ng akŏ thun truh ră anai, hơmâo laih hơdôm rơtuh boh ƀat tô mă akan ngừ pơwơ̆t glăi sĭ akan, hrŏm hăng anun hơmâo dong lu ƀat tô nao pơ ia rơsĭ; abih bang hơmâo wai lăng kjăp.

“Anih wai pơgang guai Đà Rằng leng kơ hơmâo soh mơnuih dŏ gak lơ̆m ƀat tô, song pơwơ̆t glăi ƀudah nao pơ ia rơsĭ, leng kơ sem lăng tong ten tui tơlơi pơkă pơgang guai. Ngă hrŏm hăng hơdôm boh tơdrun mă akan kiăng pơdah hră pơ-ar čih pioh hrơi nao mă akan, hăng pơhlom djơ̆ tơlơi phiăn pơgăn mă akan soh tơlơi phiăn ƀơi ia rơsĭ”.

Tơdrun nao mă akan Phú Lạc jing anih mă bruă mơ̆ng rơbêh 650 boh ƀat tô mă akan. Rim hrơi, hơdôm pluh boh ƀat tô mă akan hăng ƀat tô djru ba glăi akan sĭ kơ ƀing mơdrô pơ ƀôn prong Hồ Chí Minh, Dap Kơdư hăng sĭ kơ sang măi pơkra akan hơdang črô̆ amăng hruh. Tơhan pơgang guai mơ̆ng Puih kơđông tơhan Hòa Hiệp dŏ gak hrŏm hăng mơnuih mă bruă pơ tơdrun ia pôr pơthâo, pơtô brơi neh wa ngă tui djơ̆ tơlơi pơtrun mă akan hơdang. Thiếu tá Lương Công Hậu, Kơ-iăng khua Puih kơđông tơhan Hòa Hiệp lăi: “Kiăng rơnuk rơnua lơ̆m mă akan jing anom bruă pôr pơthâo lu wơ̆t kơ neh wa thâo ayuh hyiăng, adai pơ ia rơsĭ; lăi pơthâo kơ neh wa pơhlom mă akan rơnuk rơnua, ngă tui tơlơi pơkă IUU, ƀu dưi nao pơ ia rơsĭ čar arăng ôh. Pok pơhai ngă djơ̆ tơlơi pơkă čih anăn pơsit bruă nao rai pơ tơdrun ia kơ ƀat tô, ngă hră nao pơ ia rơsĭ mă akan”.

Mông anai jing bơyan nao mă akan laih. Akan hơmâo biă amăng hơdôm hrơi akŏ thun nao mă, anun yơh pơtrut pran jua neh met wa gir nao mă akan truh hrơi têt mơtăm, čang rơmang hơmâo lu. Hrŏm hăng pơgang lŏn ia, tơhan pơgang guai ăt jing anih kơnang mơ̆ng neh met wa mă akan mơn lơ̆m nao pơ ia rơsĭ. Mơ̆ng bruă pơtô ngă hră, pôr pơthâo pơgăn amă akan IUU, truh kơ djru ba mơnuih bưp tơlơi truh pơ ia rơsĭ, rup tơhan pơgang guai jing jê̆ giăm laih. Ơi Hà Thanh Hùng, dŏ pơ phương Phú Yên, tơring čar Dak Lăk, lăi: “Hăng adơi ayong tơhan pơgang guai, gơmơi hok mơak biă, mơ̆ng kual lŏn hăng kơdư truh pơ ia rơsĭ, lơ̆m ƀat tô, song gơmơi bưp tơlơi truh ƀudah kơƀah hơget thơ, adơi ayong tơhan djru ba mơtăm yơh. Hăng hơdôm hrơi bơyan bơnga, gơñu ăt djru ba ƀing gơmơi lu mơn, pơtă pơtăn mơ̆ng bruă anet kơ tơlơi hơget thơ kơnuk kơna ta kŏm”.

Kiăng ngă tui djŏp tơlơi pơkôl pơkă mă akan hơdang, rim wơ̆t nao pơ ia rơsĭ, tơhan pơgang guai tơring čar Dak Lăk ngă hrŏm hăng pô song, ƀat tô pôr pơthâo, lăi rơđah kơ mơnuih mă akan thâo pơgang, pơgăn mă akan soh tơlơi phiăn (IUU). Lơ̆m nao pơ ia rơsĭ, ƀat tô khŏm lăi pơthâo glăi bruă nao rai, anih nao, djă pioh măi krăp lăng anih đuăi hyu hăng čih pioh djŏp bruă mă akan; mă akan djơ̆ kual ia rơsĭ kơnuk kơna ta brơi hăng khut ƀu dưi mut nao pơ ia rơsĭ čar arăng ôh, ƀơ ƀrư̆ lui hĭ “kak kơñĭ” mơ̆ng Jơnum min kual Mi Kô̆ hăng Việt Nam. Đại úy Lô Văn Giới, Kơ-iăng khua apăn bruă kơđi čar Puih kơđông tơhan Hòa Hiệp Nam, Tơhan pơgang guai tơring čar Dak Lăk, brơi thâo: “Gơmơi pôr pơthâo kơ neh wa mă akan khŏm ngă tui djơ̆ hăng tơlơi pơkă mă akan hơdang, mă akan hơdang pơ ia rơsĭ, biă ñu pơgăn mă akan IUU. Mơ̆ng anun, djru neh wa hơđong pran jua hrưn nao pơ ia rơsĭ, mă akan djơ̆ tơlơi phiăn, pơhlom hơđong rơnuk rơnua guai dêh čar, bul pơtâo plao ia rơsĭ Lŏn ia ta”.

Mơ̆ng tơdrun mă akan truh pơ anih mă akan ataih, hơdôm tal nao rai pơ ia rơsĭ akŏ thun phrâo truh kơ hrơi angin wơt kơtang ia rơsĭ tơglăk, tơhan pơgang guai tơring čar Dak Lăk leng kơ pơƀuh ƀô̆ kah hăng anih kơnang kjăp mơ̆ng neh wa. Tơlơi gum hrŏm kjăp, gơgrong bruă hăng thâo ƀu-eng anun ƀu kơnong bong kjăp lŏn ia, rơnuk rơnua ia rơsĭ đôč ôh, ăt ngă kjăp hloh tơlơi khăp ƀu-eng tơhan hăng mơnuih ƀôn sang, pơtrut tui pran đăo kơnang kiăng neh wa hơđong pran hloh lơ̆m nao pơ ia rơsĭ, dŏ hơdip pơ ia rơsĭ, ngă pơdrong brơi lŏn ia.