Jơlan rơdêh đuăi hmar Ninh Bình-Nam Định - Thái Bình tui him lăng glông giăm 88 km. Jơlan Gia Nghĩa (Dak Nông) - Chơn Thành (Bình Phước) glông rơbêh 128 km. Kơ 2 ară jơlan anai, Ding jum wai lăng jơlan glông pơsit tong, bruă rơkâo tuh pơ alin lĕ kiăng hloh, pơhlôm rơnuk rơnua, hơđong amăng kual lŏn dăo ia krông Hồng, kual Ngŏ dơnung pơkuh nao rai hăng kual Dap kơdư.

Đĭ pơhiăp amăng mông jơnum, Khua dêh čar ơi Phạm Minh Chính lăi pơtong, jơlan rơdêh đuăi hmar Ninh Bình-Nam Định-Thái Bình amra pơkuh nao rai hăng Hải Phòng, Quảng Ninh, ngă gêh gal kiăng pơđĭ kyar phrâo hăng pơtrut pơđĭ kyar amăng đa đam kual; jơlan pơkuh nao rai mơng Dak Nông nao Bình Phước lĕ jơlan jê̆ hloh kiăng kơ đuăi nao pơ Vũng Tàu, anai lĕ jơlan akŏ phun tô nao rai mơng kual Dap kơdư noa kual Ngŏ dơnung ngă gêh gal kiăng pơđĭ kyar đơ đam kual. Khua dêh čar rơkâo ƀing khua mua pơčrông sai hơmâo tơlơi pơgôp hiăp kiăng thâo dưi ngă hơget laih, gun găn hơpă, laih dong črâo nao tong ten, kiăng gir run hloh, hơmâo hơnong pơkă tong ten, pơphun ngă tui, mơng anun, hơdôm anom bruă kiăng gir run hăng pran jua ba glăi tơlơi dưi hrŏm lĕ prong hloh.