Bruă Bơkơtuai bơwih ƀong ASIA – Thái Bình Dương (APEC) thun 2027 hăng anăn ñu “Tô nao rai, pơjing hơdôm bruă bơwih ƀong abih bang hăng gơgrong pô” amra jing gru pơđom pioh yôm phăn, pơdah pran gơgrong mơ̆ng Việt Nam amăng kual. Bruă tŭ mă ha rơbâo čô khua pơ ala, khua git gai gưl dlông hăng mơnuih bơwih ƀong mơ̆ng 21 bôh dêh čar ding kơna APEC djru Phú Quốc jing anih phun mơ̆ng hơdôm bruă kĭ pơkôl sĭ mơdrô, pơjing tơlơi rô nao rai gum hrŏm kơplah wah hơdôm bôh dêh čar bơwih ƀong prong.

Tơdơi kơ hmư̆ hơdôm tơlơi gum pơhiăp, Khua dêh čar rơkâo tơring čar Kiên Giang khom ngă dưm kơnar hrơi blan, bruă mă, pran jua jing khom pơsit rơđah rơwang bruă, mơnuih mơ̆ng rơwang bruă pioh kơ APEC. Khua dêh čar jao bruă mă kơ Kơ-iăng Khua dêh čar ơi Bùi Thanh Sơn gơgrong bôh yôm hăng bruă pơphun jơnum; Kơ-iăng Khua dêh čar ơi Nguyễn Chí Dũng gơgrong gah bruă kơsem min tuh pơplai anom mă yua; Kơ-iăng Khua dêh čar ơi Trần Hồng Hà gơgrong gah tơlơi bơdjơ̆ nao pơplih bôh than mă yua glai, lŏn ngă hmua pơdai./.