Jơnum anai dưi pơphun bưp abih bang ƀơi sang bruă kơnuk kơna hăng jơnum lăng amăng tivi hăng abih bang 63 boh tơring čar, ƀôn prong. Pơhiăp ƀơi mông jơnum, Khua dêh čar ơi Phạm Minh Chính lăi pơtong, anai lĕ jơnum yôm biă mă hăng dưi git gai tañ wơ̆t hăng hơmâo lu tơlơi dŏ čang rơmang kơ yak rơbat rŭ glăi, pơđĭ kyar hmar bruă tuai čuă ngui, mơ̆ng anun, djru hrom pơblang tong ten anŏ pơđĭ kyar hiam klă mơ̆ng djop anom bruă, mă bruă pơdjơ̆ nao, ăt kah hăng pơđĭ kyar bơwih ƀong huă mơnuih mơnam lŏn ia.

Khua dêh čar pơčrâo rơđah, thun 2023 hăng thun blan pơ anăp,djop anŏ gun kơ bruă tuai mut tơbiă amăng dêh čar yua hui Covid 19 amra lui abih yơh. Bruă ngă anai, amra ba glăi hơdôm tơlơi gêh găl, amuñ hloh samơ̆ ăt hơmâo tơlơi tơnap tap, lông lăng, pơhno nao rai kơtang kơplah wah dêh čar ta hăng anih anom tuai hyu ngui pơkŏn.