Tơdơi kơ hmư̆ hơdôm tơlơi pơgôp hiăp, pơđut jơnum, Khua dêh čar ơi Phạm Minh Chính hơmâo pơčrâo rơđah boh tơhnal dưi ngă laih, hơdôm anŏ dŏ gun kơƀah, amăng anun lăi rơđah “5 mơta bruă aka dưi ngă” kah hăng : Tơlơi tơnap git gai bơwih ƀong huă amăng dêh čar, boh nik ñu prăk trun nua,  kơmlai dŏ yôm, rơnoh prăk pơblih dŏ pơmă yua rơnoh mơñă ia jâo, rơnoh mơnong ƀong huă đĭ, kơmlai, prăk pơblih hăng jar kmar pơblih dŏ tơnap tap; tơlơi či truh amăng anih anom sĭ mơdrô prăk kăk, pơblih prăk, sĭ mơdrô gơnam khăng aka ƀu hơđong, tơlơi rung răng kơđi čar, bơwih ƀong huă, mơnuih mơnam ăt dŏ lu tơlơi lông lăng.

Pơ anăp anai, Khua dêh čar pơtrun hiăp, ngă tui djơ̆ Hră pơtrun jơnum ruah khua ping gah dêh čar tal XIII, tơlơi git gai mơ̆ng gơnong dlông, Ding jum kơđi čar hăng khua mua phun amăng lŏn ia. Hơdră anăp nao pơđĭ kyar bơwih ƀong huă mơnuih mơnam mơ̆ng thun 2021-2030, hơdôm akŏ bruă 5 thun sa wơ̆t mơ̆ng thun 2021-2025, hơdôm pok hră pơtrun, tơlơi pơčrâo ba mơ̆ng kơnuk kơna, Khua dêh čar. Khom ngă tui khut khăt pơsir tơlơi tơnap tap, pơgang pioh tơlơi rơnuk rơnua hơđong, khin ngă tui hơdôm tơhnal pơtrun hăng pran jua run ran kơtang hloh, pơphun bruă mă khut khăt, kơtang hloh. Mă pran jua amăng lăm ngă anŏ gơgrong, anăp nao bruă mă lăng nao pơ ataih sui thun, pơsit hrŏm, kơnang tơlơi djru mơ̆ng tač rơngiao ăt  yôm mơ̆n kiăng pơtrut pơblih. Pơtrut pran jua ngă hrŏm thâo gum pơgôp, gir run mă pô, lăng tơlơi tơnap tap sa tơlơi lông lăng laih anun pran jua kiăng hrưn đĭ. Pơtum pơsir hĭ tơlơi tơnap tap, pơtrut bruă pơkra ming sĭ mơdrô, pơsir bruă mă, djru gơnam bobng huă kơ mơnuih ƀôn sang.