Đĭ pơhiăp amăng mông jơnum, Khua dêh čar ơi Phạm Minh Chính brơi thâo, mơng akŏ thun truh ră anai, kơnuk kơna hơmâo pơphun 25 lok jơnum kơ bruă čih pơkra tơlơi phiăn, pơgôp hiăp, sem lăng, tŭ yap mă yua giăm 100 tơlơi rơkâo čih pơkra tơlơi phiăn, črăn tơlơi phiăn hăng hơdôm boh tơhnal bơdjơ̆ nao; anai lĕ boh tơhnal yôm phăn, ječ ameč kiăng pơgiong tơlơi phiăn, pơsir hĭ hơdôm tơlơi gun, ngă gêh gal brơi djop mơta kiăng klă ƀiă dong amăng hơdôm tơlơi phiăn: lŏn mơnai, čan prăk, sĭ lŏn hăng sang dŏ.

Khua dêh čar rơkâo ding kơna Kơnuk kơna đing nao pơgôp hiăp, tŏ tui pơplih phrâo, lăi pơthâo, pơgôp hiăp brơi lăp djơ̆ hloh, tong ten, tơpă sit hơdôm mơta bruă; đing nao pơčrông sai hơdôm bruă yôm phăn, bruă dŏ lu tơlơi pơmĭn phara  kiăng pơčrông sai, pơgôp hiăp amăng kơnuk kơna; pơhlôm brơi djơ̆ hrơi mông, klă hloh amăng hơdôm tal jơnum pơƀut.