Mơguah lơ 3/4, ƀơi Ƀirô Kơnuk kơna, Khua dêh čar ơi Phạm Minh Chính git gai Jơnum lăng nao rai mơng ataih Kơnuk kơna hăng hơdôm boh tơring čar blan 3/2023 kiăng lăng glăi bruă pok pơhai tơlơi klah čun mơng gơnong glông, tơlơi pơtrun mơng Khua pơ ala mơnuih ƀon sang dêh čar, yôm hloh lĕ pơčrông sai tơlơi bơwih ƀong huă mơnuih mơnam blan 3 hăng 3 blan akŏ thun 2023, bruă pok pơhai tơlơi pơtrun mrô 1 mơng Kơnuk kơna, Jơlan hơdră hơkrŭ glăi hăng pơđĭ kyar bơwih ƀong huă mơnuih mơnam, 03 jơlan hơdră tui hơnong pơkă dêh čar, bruă kah pha, jao prăk tuh pơ alin bruă čar.

Kơ bruă jao, hơdră bruă akŏ phun pơ anăp anai, Khua dêh čar rơkâo pơphun ngă tui klă, tŭ yua hơdôm tơlơi pơtrun, tơlơi klah čun mơng Ping gah, Ding jum kơđi čar, Khul git gai, Khua mua pơprong, Khua pơ ala mơnuih ƀon sang dêh čar, Kơnuk kơna, Khua dêh čar. Pơhlôm brơi klă hloh, djơ̆ hrơi mông pơkă, boh tơhnal mơ-it nao Jơnum gơnong glông lok 7 hăng jơnum lok 5 Khua pơ ala mơnuih ƀon sang dêh čar tal XV. Tŏ tui đing nao ngă hơđong tơlơi bơwih ƀong huă pok prong, wai lăng prăk kak hrŏ nua, pơtrut pơđĭ kyar, pơhlôm bơkơnar. Pơtrut bơwih ƀong sĭ mơdrô; hơmâo lu dong bruă mă brơi kơ mơnuih ƀon sang.