Ƀơi mông jơnum, Khul pơčrâo bruă pơtum jŭ yap glăi djop bruă mă mơ̆ng Khul git gai; amăng anun pơtum pơčrong sai hăng pơgôp hiăp kơ bruă pơsir hĭ hơdôm tơlơi gun brơi kơ Gong phun jua pơhiăp Việt Nam (VOV) lơ̆m pơsir hơdôm tơlơi pơdjơ̆ nao kơ VTC mơ̆ng jơlan hơdră djru prăk, djru kơ mơnuih mă bruă apah, pơsir kông ngăn hăng pơsir hnưh dong, sit pơdơi abih bruă mă gong phun pơdah rup VTC pơblih jao ngă bruă pơkŏn glăi hăng Gong phun pơdah rup Việt Nam.

Klah čun ƀơi mông jơnum, Khua dêh čar ơi Phạm Minh Chính čih pioh tơlơi gir run, glăm ba mơ̆ng ding kơna amăng khul pơčrâo bruă, git gai, boh nik ñu Ding jum wai lăng bruă čar, anom bruă djru phun pơčrâo ba laih anun anom bruă kơ Kơnuk kơna dêh čar gum hrŏm; khom čih pioh tơlơi pơgôp hiăp hăng pơđing hmư̆ mơ̆ng djop sang bruă kiăng ngă giong sa yak dơ̆ng hơdôm pok hră pơar pơtrun mơ̆ng gơnong dlông ping gah, Ding jum kơđi čar. Lăi nao kơ hơdôm bruă pơdjơ̆ nao kơ VTC pơsir bruă mă kơ mơnuih apăn bruă, mơnuih mă bruă apah ƀong prăk blan, Khua dêh čar pơčrâo rơđah, tui hăng tơlơi ngă hrŏm, ngă hiư̆m pă pơhlôm klă tơlơi pơtrun mơ̆ng ping gah, tơlơi phiăn kơnuk kơna  ngă tui djơ̆ laih anun pơgang ba anŏ tŭ yua kơ mơnuih mă bruă djơ̆ găl hlom bom.