Ƀơi mông jơnum, pơ ala kơ hơdôm anom bơwih ƀong hăng khul bơwih ƀong bơni hơ-ơč kơ boh than đĭ kyar bơwih ƀong huă mơnuih mơnam mơ̆ Việt Nam hơmâo ngă amăng hơdôm thun rơgao, jing anih bang bơngač kơ đĭ kyar ƀơi rŏng lŏn tơnah. Laih dong lăng yôm anih anom tuh pơ alin sĭ mơdrô ƀơi Việt Nam jai hrơi pơplih tui hăng jing anih tuh pơ alin ngă pơhưč ƀơi rŏng lŏn tơnah.

Ƀing khua ăt lăi nao lu tơlơi mơn, rơkâo đĭ hăng Gong gai dêh čar, Khua dêh čar hơdôm bruă bơdjơ̆ nao ngă hră pơ-ar, prăk jia, nao rai sĭ mơdrô hăng čar rơngiao, mă yua tơlơi rơgơi, boh thâo phrâo...laih anun čang rơmang tuh pơ alin dong mơn hăng Việt Nam amăng bruă pơkra apui lơtrik pơkĕ jua angin gah ia rơsĭ, apui hrĭp pơ-iă yang hrơi...Pơhiăp ƀơi mông jơnum, Khua dêh čar ơi Phạm Minh Chính bơni kơ anom bơwih ƀong kual Mi Kô̆ hơmâo lăng Việt Nam kah hăng plơi pla gơñu pô či tuh pơ alin bơwih ƀong. Khua dêh čar čang rơmang hơdôm anom bơwih ƀong kual Mi Kô̆ tuh pơ alin na nao ƀơi Việt Nam. Khua dêh čar ta pơsit, Việt Nam amra pơklaih brơi hơdôm tơlơi tơnap, tơlơi gun, djru ngă gal brơi kiăng anom bơwih ƀong EU tuh pơ alin đĭ kyar.