Khua dêh čar lăi pơtong, bruă mă pơhlôm hlâo, pơgăn phăk phai kông ngăn dưi hơmâo Ping gah, kơnuk kơna đing nao biă mă laih anun hloh kơ anun dơ̆ng ră anai lŏn ia hlăk dong ƀơi anăp anŏ gêh găl gru phun dêh čar yak nao amăng rơnuk tơpưn hrưn đĭ pô mơ̆ng djuai ania.

Kơnuk kơna hơmâo akŏ pơjing Khul git gai bruă pơhlôm, pơgăn phăk phai kông ngăn hăng ƀing ding kơna abih bang khua ding jum, anom bruă bơkơnar ding jum kiăng pơsir tơlơi hơmâo, bruă mă ngă phăk phai kông ngăn amăng atur tơlơi bơwih ƀong huă, pơjing pran kơtang pơblih phrâo, kiăng ngă tui tong ten amăng bruă anai. Khua dêh čar pơčrâo rơđah, jơnum blung a anai kiăng hrŏm hơbit jŭ yap glăi djop bruă mă hơmâo pok pơhai laih, boh tơhnal ngă tui, tơlơi tơnap tap, anŏ kơƀah hăng phun tơdŭ ngă rai kiăng hơmâo tơlơi hrăm pơsir hĭ tŭ yua, kiăng ngă atur kơ bruă či ngă pơ anăp adih, biă mă ñu pơsir tơlơi tơnap ngă gun hĭ lu kơčăo bruă sui thun dŏ glăi kiăng pơsir đut tơhnal, pơsir hĭ pran kơtang pơtrut bơwih ƀong huă.