Jơnum hơmâo pơphun lăng mơ̆ng ataih amăng tivi ƀơi Sang bruă kơnuk kơna hăng 9 boh tơring čar hơmâo hrĕ apui đuăi nao. Ƀơi mông jơnum, khua mua ding jum, anom bruă bơdjơ̆ nao lăi pơthâo pok pơhai kơčăo bruă; lăi pơthâo tơnap tap, tơlơi gun, ba tơbiă bruă mă, hơdră ngă bruă đah mơ̆ng pok pơhai kơčăo bruă gêh gal hloh.

Pơđut mông jơnum, Khua dêh čar ơi Phạm Minh Chính lăi, hơdôm anom bruă hơmâo ngă hrŏm kjăp, ngă hrŏm hăng mơnuih ƀôn sang, anom bơwih ƀong yua tơlơi gêh gal hrŏm, bĕ hĭ tơlơi ƀu klă, tơlơi hưp ham amăng bruă pok pơhai, kiăo tui pran jua “pơhmư̆, lăi pơthâo nao rai, mă bruă”, “gum ngă, gum truh kih hăng gum tŭ mă tơlơi klă hiam”. Hơdôm boh tơring čuk pơkra anih, jao anih pioh pơkra, dăng hrĕ kơ pô tuh pơ alin pơkra; khŏm tañ ba pơđuăi ană plơi pơ anih dŏ phrâo, hăng ngă hră pơ-ar brơi ană plơi nao dŏ pơ plơi phrâo, pơhlôm hơmâo anih či pơdong gong apui dăng hrĕ amăng blan 6/2024.