Khua dêh čar ơi Phạm Minh Chính mơ-ĭt tơlơi hơ-ưč hmưi hok mơ-ak truh abih bang grŭp pơhrăm hăng grŭp đă bôh lông dêh čar Việt Nam tơdơi kơ dưi măng tal pơplông đă bôh lông rơgao. Khua dêh čar ta pơdah pran jua ư-ang, bơni kơ Grŭp đă bôh lông hmâo gir run, pơplông abih pran jua, gum hrŏm hơbit, ƀu pơdơi; Pơtŏng sit, truh kih anai ƀu kơnong kơ tơlơi ư-ang mơ̆ng bruă bơkơjăp drơi jăn Việt Nam ôh mơ̆ ñu dô̆ jing pran pơtrut kơ abih bang djuai ania, pơdah tơlơi čang rơmang hrưn đĭ hăng dưi ngă truh rơnoh phrâo.

Khua dêh čar mơ-ĭt tơlơi thâo tơngiă dơlăm truh grŭp pơhrăm đă bôh lông, grŭp mơnuih gum djru, hơdôm mơnuih gum hrŏm hăng grŭp đă bôh lông. Khua dêh čar biă ñu bơni hơdôm klăk čô mơnuih đing nao amăng đơ đam dêh čar hmâo gum hrŏm, pơsur pran jua hăng jing anih ăh kơnang kơjăp mơ̆ng grŭp đă bôh lông amăng glông bruă dưi ngă dlông hloh mơ̆ng bruă đă bôh lông ƀơi kual.

Hơdôm rơbâo čô mơnuih ƀôn sang Việt Nam nao ĕp lăng čưng boh lông ƀơi tơdron čưng boh lông hmư̆ hing dêh čar Thai Lan, Rajamangla či plơi prong jưh jom Bang Kok, tlam mơmŏt lơ 5/1 hok mơak biă mă yua grup đă boh lông mơ̆ng Việt Nam ƀong hĭ Thai Lan, Việt Nam dưi hơmâo mă kup anăn kơtang hloh ASEAN CUP 2024. Mơnuih ƀôn sang khăp kơ čung boh lông ur hrek “Việt Nam pô kơtang hloh” hrŏm hăng tơlơi adoh “ Như có Bác Hồ trong ngày vui đại thắng”. Lu mơnuih ƀôn sang amăng dêh čar ăt trun nao pơ jơlan rŭi hyu mơak hrŏm. Anai lĕ kup dưi hloh tal klâo mơ̆ng grup đă boh lông Việt Nam dưi hơmâo mă amăng kual ASEAN.

Ƀơi kual Dap Kơdư ăt hok mơak hrŏm djop anih. Ƀơi kaphuôr anih tơkuh năm arăt jơlan tong krah plơi prong Ƀuôn Ma Thuôt, Dak Lak, lu mơnuih nao pơtum pơ anun, djă hla kơ mriah, rup pơtŭ kơñĭ hăng adoh tơlơi adoh “Như có Bác Hồ trong ngày vui đại thắng". Abih bang adoh hăng tơlơi adoh bơni tŭ yua prong hloh, hrŏm hăng čuh mlăi apui bơnga čreng čruăng ƀơi ngŏ adai amăng mơmŏt mlam lăng hiam mơak biă mă.