Tui hăng tơlơi lăi pơthâo, amăng 3 blan tal sa thun anai, tơlơi pơhing bơwih ƀong huă mơnuih mơnam tơring čar Thừa Thiên Huế ăt jing anih bơngač mơ̆n, amăng anun rơnoh prăk tuh pơ alin kơ abih bang mơnuih mơnam tơring čar him lăng hơmâo truh 5 rơbâo klai prăk, đĭ tui 9% pơkă hăng tal anai mơ̆n thun hlâo. Hnong pơhrui glăi prăk jia đĭ tui 3,5%. Khua dêh čar ơi Phạm Minh Chính bơni kơ tơlơi gir run hăng boh tơhnal mơ̆ Ping gah, gong gai kơnuk kơna, ling tơhan hăng mơnuih ƀôn sang tơring čar Thừa Thiên Huế dưi ngă laih, djru hrom yôm biă mă amăng bruă mă hrom amăng dêh čar. Thun blan pơ anăp, Khua dêh čar pơtrun hiăp, brơi pok pơhai ngă tui djơ̆ Hră pơtrun mơ̆ng Ping gah dêh čar tal XIII, hră pơtrun mơ̆ng ping gah tơring čar.

Jing tơring čar hơmâo lu tơlơi gêh găl pơđĭ kyar, boh nik ñu tơlơi bơwih ƀong huă amăng kual ia rơsĭ, bruă tuai hyu ngui hăng gru grua phun đưm dêh čar, ĕp lăng glai klô, tơring čar khom đing nao pơđĭ kyar bơwih ƀong huă gru grua hiam, mơnuih mơnam hăng pơgang anih dŏ jum dar lir hơbit hăng bruă mă pơgang lŏn ia, tơlơi rơnuk rơnua; đing nao kơ bruă akŏ pơdong ping gah hăng akŏ pơdong kjăp bruă ngă hrom gum pơgôp djuai ania, lir hơbit, tơpă, mơnuih ƀôn sang ngă pô hăng ba glăi boh tŭ yua.