Amăng mông jơnum abih bang, Khua dêh čar ơi Phạm Minh Chính lăi pơtong tơlơi yôm phăn mơng bruă gơgrong mă pô, ngă pô yôm phăn mơng djop dêh čar, djop khul grup amăng rŏng lŏn tơnah, amăng anun hơmâo Việt Nam hăng kual ASEAN. Tui khua dêh čar ơi Phạm Minh Chính, bruă anai pơdah bruă ngă bơkơnar amăng tơlơi rô nao rai pơtom hiăp hluai tui tơlơi pơkă kiăng ngă gêh gal brơi pơđĭ kyar; pơđĭ kyar bơwih ƀong huă kiăng huăi dŏ glăi gah tlôn; wai pơgang rơnuk rơnua, hơđong hơmâo hơkrŭ lăp djơ̆ hăng tơlơi sit nik, pơhlôm djru ba mơnuih mơnam kiăng huăi brơi hlơi ôh dŏ glăi gah tlôn, kiăng đing nao ngă bơkơnar djru mơnuih mơnam kiăng pơđĭ kyar bơwih ƀong huă; djă pioh, tŏ tui gru grua yôm phara.

Sit biă ñu hăng bruă tŏ tui tơlơi gơgrong mơng anih phun mơng kual ASEAN, Khua dêh čar lăi pơtong, kual ASEAN kiăng pơdah tơlơi gơgrong phun amăng lăm khul, kơ hơdôm bruă bơdjơ̆ nao blah ngă, bơdjơ̆ nao rung răng kơđi čar, bơdjơ̆ nao hơdôm bruă amăng rŏng lŏn tơnah ră anai. Tui khua dêh čar ơi Phạm Minh Chính, blung hlâo rĭm boh boh dêh čar hơmâo sa hơdră bruă, ngă bruă hăng ba glăi boh tŭ yua brơi hơđong ngă hrŏm hăng pơđĭ kyar ră anai amăng rŏng lŏn tơnah; dua dong lĕ ASEAN kiăng pơmut hrŏm boh tŭ yua mơng djop dêh čar amăng kual ASEAN kiăng pơtrut pơsur hơdôm kual pơkŏn, brơi hơdôm boh dêh čar amăng rŏng lŏn tơnah dong.