Ƀrô hơdor glăi 94 thun Hrơi akô̆ pơjing Khul hlăk ai Cộng sản rơnuk Hồ Chí Minh dêh čar ta (26/3/1931 – 26/3/2025), mơmot lơ 23/3, ƀơi Hà Nội, Khua dêh čar ơi Phạm Minh Chính nao pơhmư̆ mông ngă Lơphet ƀơk pri bơni Gru ba jơlan hlâo hlăk ai Việt Nam rơgơi thun 2024, hăng anăn ñu “Bruă mă ư-ang” yua kơ Khul hlăk ai Cộng sản rơnuk Hồ Chí Minh dêh čar ta, Keh prăk ia rơgơi hlăk ai Việt Nam, Gong phun pơdah rup Việt Nam gum hrŏm pơphun. Thun 2024, Grŭp pơphun bruă pơplông hmâo čơkă mă 159 pok hră ruah mă mơ̆ng 55 bôh anom amăng đơ đam dêh čar.

Khul pơphun bruă pơplông hmâo ruah mă laih 10 čô mơnuih hlăk ai rơgơi Việt Nam hăng 8 čô hlăk ai Việt Nam amra čang rơmang hmâo bôh than rơđah, prong hloh amăng hơdôm bruă: Pơhrăm; Kơsem min bôh thâo phrâo – pơčeh phrâo; Mă bruă bơwih ƀong huă; Sĭ mơdrô – pok phun bruă mă; Pơgang lŏn ia; Rơnuk rơnua plơi pla; Bơkơjăp drơi jăn; Bruă mă mơnuih mơnam; Bôh thâo đưm adôh suang; Wai lăng bruă Kơnuk kơna dưi pơ-ư pơ-ang. Khua dêh čar ơi Phạm Minh Chính mơ-ak nao pơhmư̆ mông pơpŭ hlăk ai rơgơi mơbruă – pô lŏn ia pơgi kơdih anai, hăng bruă mă ba jơlan hlâo, khul ba gru hlâo hăng pran jua “Hlăk ai Việt Nam ư-ang, đăo kơnang kơjăp tui Ping gah” ngă brơi lŏn ia kơjăp yak nao rơnuk phrâo. Khua dêh čar čang rơmang Hlăk ai Việt Nam khom đing nao ngă tui dưm kơnar, pơplih phrâo mơnuih mơnam, pơhlôm hơđong tơlơi hơdip mơnuih mơnam, pơđĭ tơlơi hơdip mơda mơnuih ƀôn sang, pơplih phrâo hơdôm hơdră pơtrun, hơdră bruă gum djru mơ̆ng Ping gah, Kơnuk kơna gah pơhlôm hơđong tơlơi hơdip mơda mơnuih mơnam, biă ñu ngă juăt hăng tơlơi dưm kơnar gah pơtô pơhrăm, bruă ia jrao amăng djop kual ƀơi lŏn ia, truh rim plơi pla, djuai ania, rim sang anô̆ hăng rim mơnuih ƀôn sang, biă ñu kual čư̆ siăng, kual asuek ataih, guai dêh čar, bul ia rơsĭ hăng pran jua “Ƀu lui lơi hlơi gah tlôn”./.