Khua git gai Ping gah dêh čar ơi Tô Lâm pơsit tong Việt Nam lăng Singapore ƀu djơ̆ kơnong bơnah ding kơna hrŏm kual ASEAN đôč ôh mơ̆ ăt lĕ bơnah ngă hrŏm phun, gum hrŏm amăng pơđĭ kyar hăng mut hrŏm jar kmar mơng Việt Nam. Lăng yôm hơdôm boh tơhnal yôm phun mơ̆ dua bơnah tŭ ư hrŏm amăng hơdôm tal jơnum bơkơtuai hăng khua mua Singapore amăng hơdôm tal nao čuă sit nik Singapore kah hăng bruă dua bơnah tŏ tui kĭ dong lu tơlơi pơkôl ngă hrŏm phrâo kơnong dua wŏt hrơi tơjuh tơdơi kơ tal nao čuă, Khua git gai Ping gah dêh čar rơkâo dua bơnah tañ ngă tui tong ten tơlơi rô nao rai ngă hrŏm yôm phăn djop mơta kơplah wah dua boh dêh čar hluai tui bruă kĭ jơlan hơdră ngă bruă pok pơhai tơlơi rô nao rai ngă hrŏm yôm phăn djop mơta rơwang thun 2025-2030.

Dua čô khua tŭ ư  ngă dơlăm ƀiă dong tơlơi rô nao rai kơplah wah dua Ping gah apăn akŏ, tŏ tui ngă hrŏm pơtô pơjuăt brơi ƀing apăn bruă phun, kơsem min akŏ pơjing bruă pơbưp nao rai tui tơđar kiăng thâo hluh tơdruă, pơlăi nao rai tơlơi găn rơgao pơđĭ kyar lŏn ia, ngă atur brơi tơlơi rô nao rai dua bơnah kơñ pơgi.