Mơguah tom brơi (28/3), ƀơi Ƀirô mă bruă, Khua mir sir ơi Lương Cường hơmâo git gai mông čơkă Khua mir sir Brazil ơi Luiz Inácio Lula da Silva rai čuă gưl kơnuk kơna pơ Việt Nam. Tơdơi kơ mông čơkă sit nik yôm phăn, Khua mir sir ơi Lương Cường hơmâo jơnum bơkơtuai hăng Khua mir sir Lula da Silva. Amăng mông jơnum, Khua mir sir ơi Lương Cường lăi pơtong tal nao čuă anai kiăng pơsit tong Brazil lăng yôm hăng čang rơmang kơtưn tơlơi rô nao rai ngă hrŏm yôm phăn hăng Việt Nam amăng djop hơdră pơđĭ kyar tơlơi rô nao rai hăng kual ASEAN laih dong kual Asia-Thái Bình Dương.

Dua čô khua pơlăi nao rai, tŭ ư djop jơlan gah, hơdră bruă kiăng tŏ tui pơđĭ kyar tơlơi rô nao rai ngă hrŏm yôm phăn Việt Nam-Brazil jai hrơi dơlăm tui, sit nik hăng tŭ yua, kah hăng pơlăi nao rai hơdôm bruă amăng kual hăng jar kmar dua bơnah đing nao. Lăi nao tơlơi yak nao pơđĭ kyar lŏn ia, dong yua hơdôm rơnoh yôm mơng djop bơnah, ngă hrŏm pơđĭ kyar, hăng hrưn đĭ tơlơi gơgrong mơng hơdôm boh dêh čar glăk pơđĭ kyar amăng hơdră wai lăng rŏng lŏn tơnah, dua čô khua tŭ ư kơtưn gum hrŏm, ngă hrŏm hăng dong yua tơdruă amăng hơdôm khul grup jar kmar, jơnum djop bơnah hăng pơlir kual.