Tŭ ư tơlơi jak iâu mơ̆ng Khua mir sir ơi Lương Cường hăng Bơnai ñu, Ơi pơtao dêh čar Bỉ Philippe hăng Bơnai ñu rai čuă Kơnuk kơna Việt Nam mơ̆ng lơ 31/3 truh lơ 4/4/2025. Mơguah lơ 1/4, tơdơi kơ mông čơkă yôm hơmâo pơphun ƀơi Sang bruă mir sir, Khua mir sir ơi Lương Cường hăng Ơi pơtao dêh čar Bỉ Philippe hơmâo mông jơnum.

Ƀơi mông bưp, Khua mir sir ơi Lương Cường pơsit Việt Nam lêng kơ lăng yôm hăng čang rơmang pơđĭ tui tơlơi ngă hrŏm amăng lu mơta bruă hăng Bỉ, dêh čar ding kơna hăng hơmâo boh pơhiăp yôm biă amăng EU; pơpŭ kơ tơlơi gum djru mơ̆ng mơnuih ƀôn sang dêh čar Bỉ pioh kơ Việt Nam amăng thun blan blah ayăt pơklaih rơngai lŏn ia hlâo adih, ăt kah hăng pran jua khăp ƀu-eng, tơlơi gum djru prong mơ̆ng hơjăn Ơi pơtao hăng Bơnai ñu kơ lŏn ia, mơnuih ƀôn sang Việt Nam laih anun tơlơi rô nao rai dua boh dêh čar hrơi blan rơngao. Dua čô khua pơčrông kơ hơdră ngă hrŏm prong hloh kơplah wah dua bơnah kiăng ba tơlơi ngă hrŏm Việt Nam - Bỉ dlăm hloh, sit nik hloh, tŭ yua, hơmâo tom bruă pơbưp hăng bơkơtuai khua mua djŏp gưl lu hloh, biă mă ñu gưl prong, ƀơi djŏp anom bruă Ping gah, Kơnuk kơna, Gong gai, Ƀirô pơ ala mơnuih ƀôn sang dêh čar; pok pơhai tŭ yua hơdră ngă hrŏm dua bơnah glăk hơmâo hăng kơsem min čih pơkra hơdră ngă hrŏm phrâo đah mơ̆ng ngă dlăm hloh tơlơi ngă hrŏm tui rim mơta bruă mơ̆ng dua boh lŏn ia.