Pơ ala kơ Ping gah, Kơnuk kơna hăng Mơnuih ƀôn sang Việt Nam, Khua git gai Ping gah ơi Tô Lâm rơngôt biă hăng tơlơi djai rơngiă mơ̆ng ơi Khamtay Siphandone laih anun mơ-it hiăp kơ khua mua dêh čar Lao, mơnuih ƀôn sang dêh čar Lao wơ̆t hăng sang anŏ rơgŏm ơi Khamtay Siphandone tơlơi rơngôt, hơ-ŭ kơtang biă.

Khua git gai Ping gah ơi Tô Lâm lăi, ơi Khamtay Siphandone ƀu kơnong jing sa čô khua git gai rơgơi mơbruă rơnuk hlâo amăng bruă ngă hơkrŭ, pơgang hăng pơđĭ kyar lŏn ia, pô khua nao hlâo pơplih abih bang Ping gah mơnuih ƀôn sang Lao đôč ôh mơ̆ ăt jing gơyut ngă giăng mah, nao hrŏm hăng Việt Nam amăng thun blan blah ayăt pơgang lŏn ia hăng akŏ pơdong kơnuk kơna mơ̆ng dua djuai ania. Tơlơi djai rơngiă anai jing tơlơi rơngôt prong biă hăng Ping gah, Kơnuk kơna wơ̆t hăng mơnuih ƀôn sang dua boh dêh čar Lao hăng Việt Nam. Kiăng pơpŭ kơ tơlơi gum pơgôp prong prin mơ̆ng ơi Khamtay Siphandone kơ tơlơi đĭ kyar rô nao rai kjăp phik Việt Nam - Lao, Ping gah, Kơnuk kơna Việt Nam pơsit hơ-ŭ dua hrơi, mơ̆ng lơ 4 truh lơ 5/4/2025.