Pơ ala kơ Ping gah dêh čar, Khua git gai Ping gah dêh čar lăi pơhing kơ sa dua hơdră pơtrun bruă pioh hmâo tơhnal prong hloh “hơđong mơnuih mơnam, pơđĭ kyar bơwih ƀong, pơđĭ dlông tơlơi hơdip mơda mơnuih ƀôn sang”, truh thun 2030, dêh čar ta jing dêh čar glăk pơđĭ kyar, hmâo măi mok rơnuk anai, truh thun 2045 jing dêh čar pơđĭ kyar, hmâo prăk pơhrui glăi lu. Khua git gai Ping gah dêh čar pơtŏng sit, Ping gah hăng Kơnuk kơna đing nao prong bruă djă pioh tơlơi rơnuk rơnua, hơđong pioh pơđĭ kyar lŏn ia.

Ping gah ta ƀu hmâo tŭ yua hơpă pơkon rơngiao kơ bôh tŭ yua mơ̆ng Mơnuih ƀôn sang; mơnuih ƀôn sang jing phun, pô amăng djop hơdră pơtrun, jơlan gah mơ̆ng Ping gah; djop tơlơi hrưn đĭ mơ̆ng Ping gah, Kơnuk kơna, abih bang glông bruă kơđi čar kơnong kơ hmâo bôh tŭ yua lơm mơnuih ƀôn sang hmâo tơlơi hơdip mơda trơi pơđao, yâo mơ-ak. Yua anun yơh, Ping gah, Kơnuk kơna amra đing nao hơdôm bruă bơwih brơi, pơđĭ dlông tơlơi hơdip mơda mơ̆ng Mơnuih ƀôn sang, biă ñu lĕ neh wa djop djuai ania ƀiă ƀơi kual asuek, ataih, guai dêh čar, bul ia rơsĭ, kual ngă hơkrŭ đưm, hơdôm kual gơgrong bruă, kual hmâo lu neh wa tui đăo. Ngă tui klă hơdră bruă hơđong tơlơi hơdip mơda mơnuih mơnam, bôh tŭ yua mơnuih mơnam, hơdră bruă pioh kơ mơnuih djru ngă hơkrŭ đưm; ngă tui hơdră bruă lui prăk hrăm pioh kơ djop gưl; pơsit pran jua ngă giong bruă pơsir sang tơ̆i, sang răm amăng đơ đam dêh čar; đing nao pơđĭ kyar bruă ia jrao, bơwih brơi tơlơi suaih pral mơnuih ƀôn sang, anăp nao pơjrao brơi đôč kơ abih bang djop mơnuih ƀôn sang, pioh rim mơnuih ƀôn sang Việt Nam sit nik hmâo tơlơi hơdip mơda trơi pơđao, yâo mơ-ak./.