“Tơlơi thâo kah hăng čing samơ̆ bruă pơtom hiăp kah hăng jua mơñi. Čing ania prong, jua mơñi tơ-ua kơtang mơ̆n”. Anai lĕ, tơlơi pơtong rơđah mơ̆ng Khua mir sir Hồ Chí Minh lăi amăng thun 1945 kơ anih dŏ, anŏ gơgrong mơ̆ng bruă pơtom hiăp. Blah dưi ƀơi Điện Biên Phủ thun 1954 jing kah hăng jua čing mơñi tơ-ua, guang hyu bă hră amăng rŏng lŏn tơnah, pơmong nao kơ mông jơnum bơkơtuai ƀơi Geneve, pơrai abih tơlơi pơmin ayăt sua lŏn ia, tơlơi kơtư̆ djuai ania Việt Nam mơ̆ng ayăt Prang, brơi gơñu khom dŏ ber hrŏm bơkơtuai hĭ ƀơi anăp mơta hăng Kơnuk kơna Việt Nam Dân chủ Cộng hòa. Kơ-iăng khua dêh čar, ơi Buì Thanh Sơn lăi pơtong, Hră pơkôl Geneve thun 1954 sa gru kơnăl lăp hơdor pioh, hrup tơlơi bơngač kơtang  bang prong biă mă amăng bruă čih pioh gru phun hơkrŭ  mơ̆ng Việt Nam, djă jă gru kơđŏm tơlơi pơmin, tơlơi mă bruă hăng tơlơi rơgơi kơhnâo pơtom hiăp, pơsir kơđi mơ̆ng Hồ Chí Minh.

 “Lơ̆m nao bơkơtuai, kĭ pơkôl hăng ngă tui Hră pơkôl Geneve lĕ sa hơdôm hră čih pioh lu tơlơi rhăm yom pơphăn biă mă mơ̆ng tơlơi pơmin kơ bruă pơtom hiăp, bơkơtuai kơđi Việt Nam, hơmâo djă pioh, tŏ tui, ba yua hăng anŏ thâo pơčeh phrâo laih anun pơđĭ kyar tui, truh thun kĭ pơkôl sơñêlơpai anăn hră pơkôl Paris thun 1973 tơdơi anai, ăt hnun mơ̆n amăng bruă man pơdong hăng pơđĭ kyar lŏn ia hăng pơgang dêh čar ta ră anai”.

Hơdôm gưl rơnuk ană tơčô mô yâo ră anai, pơ-ư ang biă mă blah dưi Điện Biên Phủ lăi pha hăng hơdôm tal blah ayăt sua lŏn ia ta tơdơi kơ anun hnun mơ̆n, kiăng gir run hloh, khut khăt pran jua amăng bruă man pơdong lŏn ia rơnuk pơklaih rơngai, hing ang, pơdrong sah ăt dŏ djă pioh tơlơi pơmin thâo rơgơi bruă pơtom hiăp. Kơ-iăng nai tha prin, nai prin tha ơi Nguyễn Đức Hòa, Sang hră gưl prong Sài Gòn, lăi pơthâo:

“Kâo pơmin lĕ, boh yom, anŏ bơbeč djơ̆ mơ̆ng tơlơi anun ăt dŏ prong hăng ƀing ta hlăk dŏ djă pioh pơđĭ tui. Rŏng lŏn tơnah anai thâo hăng hmư̆ hing kơ boh tơhnal hing ang djuai ania ta blah dưi ƀơi Điện Biên Phủ, anun yơh rŏng lŏn tơnah ăt kiăng ƀuh dêh čar Việt Nam kơtang, khin hơtai, pơdrong sah. Tui anun tơlơi hơdor glăi kơ Điện Biên Phủ amra ƀu lă hĭ ôh amăng pran jua mơnuih ƀôn sang Việt Nam hăng mơnuih ƀôn sang rŏng lŏn tơnah”.

Ƀơi anăp hơdôm tơlơi pơblih tơnap amăng rŏng lŏn tơnah ră anai, ba yua thâo pơčeh phrâo hơdôm tơlơi hrăm amăng rơnuk blah wang đưm, Việt Nam hơmâo pơsir djơ̆ lăp hăng hơmâo jơlan hơdră pơkă hơnơ̆ng ngă tui hiam klă, pơtrut pran jua thâo hơdor tơngia laih anun bruă ngă giăng mah, sơ̆n pran jua kiăo tui jơlan hơdră pơtom hiăp hăng ngă hrŏm. Yua kơ anun, djă pioh bruă ngă mơak rơnuk rơnua, hơđong, pơgang tong ten boh tơhan rơngai lŏn ia, ngă khua pô hăng hlom bom dêh čar, laih anun pơtrut ngă hrŏm bơwih brơi pơđĭ kyar mă bruă bơwih ƀong huă kơ mơnuih mơnam dêh čar.