Mơguah lơ 11/6, Khua pơ ala mơnuih ƀôn sang dêh čar tal XV pơphun yak nao rơwang tal 2, jơnum lok 9, hăng him lăng pơphun dong mơng hrơi anai truh abih lơ 27/6. Amăng mông mă bruă mơguah lơ 11/6, Khua pơ ala mơnuih ƀôn sang dêh čar hmư̆ hră lăi pơthâo sem lăng hăng pơčrông sai ƀơi grup sa, dua črăn tơlơi pơtrun, črăn tơlơi phiăn, amăng anun hơmâo akŏ bruă dưm dăp anih anom mă bruă gưl tơring čar thun 2025.

Tui akŏ bruă, Kơnuk kơna ba tơbiă 23 hơdră dưm dăp hăng 52 boh tơring čar, ƀôn prong, akŏ pơjing 23 boh tơring čar, ƀôn prong phrâo, pioh tŏ tui 11 anih anom, jing abih tih đơ đam dêh čar dŏ 34 boh tơring čar, ƀôn prong. Abih tih mơnuih apăn bruă biên chế ƀơi anih anom mă bruă gưl tơring čar dưm dăp glăi lĕ rơbêh 447.000 čô mơnuih. Ƀing khua mua lêng kơ tŭ ư hăng hơdră bruă anai, lăng anai lĕ bruă pơjing akŏ bruă djơ̆ hăng tơlơi git gai mơng gơnong glông, lăp djơ̆ hăng tơlơi pơtrun mrô 60/2025 mơng Jơnum gơnong glông 11, tal XIII.