Jơnum min mơnuih ƀôn sang tơring čar Gia Lai ngă hră pơtrun, brơi pơsit hĭ akŏ bruă pơđĭ kyar hăng pơđĭ tui boh tŭ yua hiam bruă pơtô hrăm ƀơi djop sang hră đôm lăm, čem rông čơđai sang hră kơnuk kơna pioh kơ čơđai sang hră djuai ƀiă, wơ̆t sang hră kơnuk kơna djru ha mơkrah dŏ glăi ƀong huă ƀơi sang hră tơhrơi, thun hrăm 2025-2030, hăng rơnoh prăk truh kơ 728 klai prăk.

Kơčăo bruă anăp nao pơhlom ba tơlơi dưi hrăm hră kơ čơđai sang hră mơnuih djuai ƀiă, ĕp mơnuih apăn bruă thâo rơgơi tơdơi anai, bơwih brơi bruă mă pơđĭ kyar bơwih ƀong huă mơnuih mơnam ƀơi kual ataih, kual asuek.

Tơring čar pơkă tơhnal bruă pơđĭ tui hơnơ̆ng mrô čơđai sang hră hrăm gưl klâo kơnuk kơna čem rông ba truh 1.500 čô amăng thun hrăm 2028-2029. Tơring čar ăt pơđĭ tui boh tŭ yua pơtô hrăm, kơnang kơ bruă pơtô hrăm brơi ƀing nai pơtô hră, boh nik ñu ƀing nai pơtô tơlơi Jrai, Bahnar; kơtưn pơtô hrăm gah bruă mă, pơtô hơdră dŏ dong ƀong huă, laih anun djă pioh gru grua hiam djuai ania.