Lơm yang hrơi phrâo brư pơčrang hyu blung a čơkă hrơi phrâo, kah đuăi hơdôm nam pơ-iă rơnang ƀơi rơhuông adai ƀlăng pơđom hăng dlông ia rơsĭ mơtah, jơngeh ƀơhač, lăng hluh gah wot truh tal san hô ƀơi yŭ ia, ƀing ling tơhan hmâo tañ laih pač ƀô̆ mơta rơmet set hăng đô̆ pioh ia djah anun tuh kơ phun pla, añăm pơtăm. Hơdôm thun jê̆ hăng anai, bul ia rơsĭ dưi tuh pơplai prăp lui anih anom dưm ia anun hmâo gơgrong hlâo pơhlôm abih bang ia kiăng yua. Trung sĩ Thái Phương Nam glăk mă bruă ƀơi bul ia rơsĭ Đá Thị lăi pơthâo:

“Gum pran amăng đang añăm, đang phun pla hăng lăng ƀuh bôh than mơ̆ng pô mơtah hlê̆, hmâo đang añăm pơplih tơlơi hơdip mơda lĕ kâo ƀuh mơ-ak biă”.

Ƀơi bul ia rơsĭ Đá Thị hmâo sa blah đang bơnga anet hiam biă pla biă ñu bơnga giấy, bơnga mẫu đơn hla anet hăng bơnga sứ. Ƀing ling tơhan pơkra jing sa bah amăng war mut tơbiă “Đảo Đá Thị” hăng pơnăng war hnal kyâo yua kơ ƀing ling tơhan pô pơkra, pơdŏng pơjing lŏm hmâo mông wăn. Đang bơnga mơ̆ng bul ia rơsĭ Đá Thị phara ha jăn biă yua kơ amra “pơplih anih” tui hyuh hyiăng, anăp angin pưh. Thượng uý Mai Vũ Thanh Nguyên, Khua git gai bul ia rơsĭ Đá Thị, brơi thâo.

“Angin tui bơyan Ngŏ Kơdư lĕ ƀing gơmơi dưm đang bơnga gah anai pioh bĕ angin. Blan 5 pơplih jing angin tui bơyan Yŭ Dơnung anăp nao mơ̆ng yŭ anai lĕ ƀing gơmơi amra rit đang bơnga nao gah kơdih pioh bĕ angin, pơhlôm abih bang kơ phun pla”.

Amăng krah ia rơsĭ tơglưč kơ ia, anô̆ mơxin amăng rim tal angin pưh, hyuh ia, ayuh hyiăng, samơ̆ juă tơkai truh pơ̆ bul pơtâo ia rơsĭ hơpă, khă bul ia rơsĭ ƀuh hăng dlông ƀudah amăng lăm ia ƀudah pra mă ia jâo DK1 – 19, hơdôm khul hyu mă bruă leng kơ heng hong dô̆ lăng hơdôm blah đang añăm mơtah hlê̆, kơthung xốp rơguăt hăng añăm čăt đĭ mơtah hlê̆. Đa ñu ƀơi anai, hla añăm puan, añăm ƀar leng kơ prong hloh kơ pla ƀơi rŏng lŏn. Bơyan phang ƀơi bul ia rơsĭ sui hrơi, truh blan 8-9 kah mơ̆ng pơphun hmâo hơjan, ƀing ling tơhan klơi amăng dor hơdôm kơthung kơ su dưm ia pioh dưm ia hơjan, mă yua wot ia yua laih pioh pruih kơ đang añăm. Pruăi akan hăng djah djâo dưi dor djơ̆ hơdră pơkă pioh jing kơmok pruai kơ đang añăm. Kơnong kơ 78m kơ rê lŏn pla añăm ƀơi bul ia rơsĭ gah yŭ ia Cô Lin, ƀing ling tơhan hmâo pĕ pơhrui rơbêh kơ 700kg añăm sa thun, pơhlôm djop brơi añăm ƀong kơ rim mông ƀong huă mơ̆ng ling tơhan. Đại úy Nguyễn Xuân Hoàng, apăn bruă kơđi čar bul ia rơsĭ Cô Lin brơi thâo, hơdôm bôh amăng luh dưi dưm dăp mơ̆ng gah rơngiao mut amăng đang añăm. Ia găn rơgao kŏng hra amra dưi pruih ƀơi gk phun pla pioh amuñ djă pioh pơsah.

“Rim hrơi rơngiao kơ mông mă bruă phun mơ̆ng anom, adơi ayong pơphun pla añăm dong. Rơngiao kơ anun dô̆ rông mơnŭ bip pioh ƀong gơnam ƀong rơbêh mơ̆ng anom. Ăt jing pioh pơplih tơlơi hơdip mơda kơ adơi ayong ƀơi bul ia rơsĭ. Bul ia rơsĭ ăt hmâo rông mơn 9 drơi asâo, ba truh tơlơi mơ-ak tơdơi kơ sa hrơi mă bruă glêh glar, rông un hăng bip pioh pơtlaih stress tơdơi kơ sa hrơi mă bruă glêh tơnap”.

Yak rơgao jơlah ia tơglăk mri dô̆ krăp “tơglăk đĭ” laih anun pơ-amŏng tơpă trun măi song ba grŭp hyu mă bruă mrô 9 mut amăng hơdôm bul ia rơsĭ, ƀing gơmơi ăt truh mơn pơ̆ bul ia rơsĭ hăng dlông ia mơtah rơ-ơ̆, tơthă kơ tơ-ui kyâo kah hăng bul ia rơsĭ Sinh Tồn, bul ia rơsĭ Đá Tây A, bul ia rơsĭ Song Tử Tây hăng bul ia rơsĭ Trường Sa. Ƀơi anai hmâo djop hơdôm djuai bôh troh mơtah hlê̆ kah hăng bôh pơ-aneh, bôh pơđung, bôh pơ-ô̆, tơbâo, bôh kruăi hrĕ, bôh al pla, hrŏm hăng hơdôm glông phun kyâo mơtah phara ha jăn kơnong kơ hmâo ƀơi Trường Sa kah hăng kyâo ƀang gal, phong ba, tra, nhàu, laih anun phi lao, phun bôh pơđung, mù u. Amai Lê Thị Kim Thi glăk dô̆ hơdip ƀơi bul ia rơsĭ Sinh Tồn ruai glăi:

“Phrâo rai pơ̆ anai kâo ăt pơmin mơn tơlơi hơdip ƀơi bul ia rơsĭ tơnap tap biă, samơ̆ rai pơ̆ laih ƀuh phun kyâo klă hiam biă. Khul tơhan hăng mơnuih ƀôn sang lĕ hơdip hrŏm mơ-ak biă”.

Lŏn pla añăm dưi ba mơ̆ng rŏng lŏn nao, pruih hăng ia ƀlăng, ia hơjan. Blan 2 truh blan 5 lĕ bơyan añăm mơtah hlê̆. Rơnuč thun hơjan lu ia rơsĭ pơprah mut amăng bul pơtâo thơ añăm juăt brŭ phun ñu, yua anun ƀing ling tơhan hăng mơnuih ƀôn sang khom ba añăm đĭ hăng dlông hloh pioh bĕ ia rơsĭ. Nai Trương Hồng Lĩnh, ƀơi bul ia rơsĭ Sinh Tồn lăi pơthâo:

“Kâo pla bơnga hăng phun bonsai, rông čim brim. Añăm hơdjă ƀong abih bang, ƀu pruih jrao ôh anun lĕ añăm tŭ, añăm hrum, añăm ƀar, húng čañ, thì là, plăng, pơhăng, añăm hơbơi, añăm hla ƀâo nghir, añăm phĭ, lăi hrŏm lu biă...”.

Ling tơhan hăng mơnuih ƀôn sang ƀơi bul ia rơsĭ ha pran jua ƀu kơnong kơ gir run pla lu añăm pơtăm, phun kyâo mă tơ-ui ƀơi djop anih amăng bul ia rơsĭ đôč ôh, ñu dô̆ pơplih anô̆ klă tơlơi hơdip mơda prong biă kơ mơnuih ƀôn sang dô̆ hơdip mơda ƀơi anai dong./.