Hrŏm hăng grŭp čơphin rup djă pioh hăng hyu hơduah ĕp anô̆ hiam đưm hơđăp ƀơi Gành Đá Đĩa, să Tuy An, tơring čar Dak Lak, amai Đào Thị Hiền, tuai mơ̆ng ƀôn prong Hà Nội ƀu tlaih heng hong ƀơi anăp glai klô klă hiam, phara ha jăn mơ̆ng ñu. Amai Hiền lăi pơthâo, ƀing adơi amai hmâo ruah laih Dak Lak lĕ anih nao čuă lăng amăng bơyan pơdơi prong anai pioh hơduah ĕp lăng glai klô hăng lông lăng gru hiam mơ̆ng sa tơring čar phrâo pơmut hrŏm lơm hmâo ruah ia rơsĭ hmâo rah glai klô.

“Tal blung a ƀing gơmơi nao pơ̆ tơring čar Dak Lak phrâo, dưi lăng ia rơsĭ mơ̆ng Dak Lak, lăng Gành Đá Đĩa, čơphin rup ƀơi anai hiam biă. Ƀing gơmơi ăt pơmin mơn čuă lăng Phú Yên giong amra nao čuă ngui pơ̆ Buôn Đôn pioh pơhlôm hơdôm tơlơi mưn ƀuh ia rơsĭ rah hăng čư̆ siăng rah. Khom lăi ră anai nao pơ̆ Dak Lak amra čuă lăng čư̆ siăng hăng lăng rah ia rơsĭ. Sa tơlơi phara ha jăn lĕ akan hơdang ƀơi anai jơman biă hăng nua ñu găp ƀrô”.

Dong mơ̆ng hrơi Kơnuk kơna hmâo hơdră pơtrun pơmut hrŏm, pơhrua hrŏm 2 bôh tơring čar, tuai čuă ngui Dak Lak – Phú Yên hmâo laih tơlơi mơ-ak phrâo. Mrô tuai čuă lăng đĭ lu dua wot bơhmu hăng hlâo. Biă ñu, ƀu kơnong kơ tuai čuă ngui rai mơ̆ng hơdôm tơring čar, ƀôn prong pơkon ôh mơ̆, tuai amăng tơring čar nao rai kơplah wah 2 kual Ngŏ hăng Yŭ tơring čar Dak Lak ăt đĭ lu mơn rim mơnuih ƀudah grŭp sang anô̆ hyu čuă ngui. Amai Nguyễn Thị Điểm, pô čơkă tuai ƀơi Rosa Alba Resort Tuy Hòa, Dak Lak brơi thâo:

“Kâo lăng ƀuh jê̆ hăng anai lơm pơmut hrŏm tơring čar lĕ tuai hyu čuă ngui ăt dik dak mơn, tuai ăt lu mơn. Ƀơi Rosa mơ̆ng ƀing gơmơi lĕ, djop kual leng kơ hmâo, khă hnun hai hơdôm blan jê̆ hăng anai lĕ ƀuh Yŭ Dak Lak trun pơ̆ anai lu biă, lu lin mơtăm. Kâo čang rơmang biă hmâo lu tuai hyu čuă ngui anai laih anun ăt čang rơmang mơn tuai rai pơ̆ anai lu hloh”.

 Tô̆ tui hăng tơlơi pơmut hrŏm tơring čar, hơdôm bôh anom bruă wai lăng tuai čuă ngui ăt hmâo čơkă mă mơn hơdôm bôh than ia rơsĭ – glai klô. Kah hăng ƀơi sang jưh tuai Dak Phú, phường Tuy Hòa, anăn iâo hmâo gep mơ̆ng anăn 2 bôh tơring čar Dak Lak hăng Phú Yên, ayong Trương Tấn Tài, Pô wai lăng sang jưh tuai brơi thâo, anom bruă ƀu kơnong kơ pơplih sa anăn tô̆ nao rai ia rơsĭ – glai klô ôh mơ̆ anăn anih anom ăt hmâo tơlơi pơmut hrŏm mơn.

“Ƀing gơmơi mă yua mơ̆ng lơ 1/6 lĕ mơ̆ng blan 5 ƀơi anih tơnă hơbai hmâo nao laih pơ̆ Dak Lak nao pel ĕp rim sang jưh tuai, gơnam ƀong, bôh thâo đưm ƀơi kual Dak Lak pioh ba truh pơ̆ anai hơdôm gơnam ƀong djă jă anô̆ phara mơ̆ng hăng dlông čư̆ kơdư kah hăng mơnŭ hơ-om, asơi ñar hrong, añăm trong luk,... Rơnoh blơi yua klă, tuai juăt anăp nao lơm rai pơ̆ anai ƀong rah gơnam ƀong mơ̆ng kual čư̆ siăng Dak Lak hrŏm hăng hơdôm añăm akan hơdang kual ia rơsĭ”.  

Tơdơi kơ pơmut hrŏm, kual gah Yŭ Dak Lak ƀuh rơđah hăng tuai čuă ngui glai klô, čuă lăng plơi pla, bôh thâo čing hơgor, gơnam ƀong huă phara ha jăn Dap Kơdư. Bơ̆ kual gah Ngŏ hmâo anô̆ gal tuai čuă lăng ia rơsĭ, plơi juăt mă akan hơdang, hơdôm djuai akan hơdang. Hơdôm tơlơi ruai kơ Ling tơhan pơsăn drơi Nam Tiến ƀơi Buôn Ma Thuột dưi ruai tô̆ tui hăng tơlơi ruai kơ Vũng Rô hăng hơdôm bôh ƀat tô “ƀu hmâo mrô”, hơdôm tơdrun tum păn găn ia krông Serepok hăng Tlaih rơngai Buôn Ma Thuột. Ơi Ngô Văn Định, Kơ-iăng Khua Khul wai lăng tuai čuă ngui tơring čar Dak Lak lăi lĕ, hơdôm anih ƀuh rơđah mơ̆ng 2 tơring čar hơđăp lơm pơmut hrŏm amra jing pran kơtang gal djru kơ 2 kual Ngŏ – Yŭ pơđĭ kyar klă hloh.

“Ƀing gơmơi amra pơhrua nao rai hơdôm tơlơi mơ̆ sui hăng anai ƀu gal mơ̆ng 2 tơring čar pioh pơjing rai gơnam tam anih anom pioh dua kual leng kơ dưi bơwih brơi kơ tuai. Dua lĕ pok prong, pơkra ming tơdrŏn rơdêh por Tuy Hòa jing tơdrŏn rơdêh por jar kơmar pioh pơgiăng tuai čuă ngui Dak Lak phrâo, bôh thâo đưm khom hmâo tơlơi pơhrua hrŏm, bruă mă khom dưi pơđĭ dlông”.

Bruă pơmut hrŏm tơring čar hmâo pơjing brơi laih bruă tuai čuă ngui Dak Lak pơjing glăi hơdră hăng anăp nao pơđĭ kyar phrâo. Tơlơi pơmut hrŏm hơdôm gơnam tam anih anom tuai čuă ngui phara ha jăn, hrŏm hăng bruă pơkra glăi anom mă yua hăng pơtô pơhrăm mơnuih mă bruă kơjăp, dưi čang rơmang amra djru pơtrut bruă tuai čuă ngui mơ̆ng tơring čar pơđĭ kyar pơ̆ anăp anai./.