Tal nao čuă gưl Kơnuk kơna pơ dêh čar Hàn Quốc mơng Khua git gai Ping gah dêh čar ơi Tô Lâm tal anai amra djru pơgôp ngă hơkrŭ ƀiă dong pran đăo gơnang kơđi čar kơplah wah dua boh dêh čar, laih dong kơdŏm glăi tơlơi yôm phăn, pok rai rơwang phrâo amăng tơlơi rô nao rai kơplah wah Hàn Quốc-Việt Nam. Amăng tal nao čuă gưl kơnuk kơna pơ dêh čar Hàn Quốc, tlam tom brơi, Khua git gai Ping gah dêh čar ơi Tô Lâm hơmâo mông bưp ơi Ahn Gyun Back, Khua grup Khua pơ ala mơnuih ƀôn sang giang mah Hàn Quốc-Việt Nam.

Khua git gai Ping gah dêh čar ơi Tô Lâm rơkâo dua grup khua pơ ala mơnuih ƀôn sang giang mah kơtưn pơbưp, ngă hrŏm, tŏ tui tơlơi gơgrong tô nao rai djơ̆ tơlơi pơkôl ngă hrŏm kơplah wah dua Ƀirô Khua pơ ala mơnuih ƀôn sang dêh čar, pơgôp krăo lăng, pơtrut pơsur, ngă gêh gal djơ̆ tơlơi phiăn amăng ngă tui hơdôm tơlơi pơkôl, tơlơi pơtrut hơmâo kĭ kơplah wah dua boh dêh čar, pơtrut tơlơi rô nao rai Việt Nam-Hàn Quốc jai dơlăm, tŭ yua hăng hơđong kjăp; laih dong kơtưn gum hrŏm, djru tơdruă amăng hơdôm mông jơnum pơlir hơbit Khua pơ ala mơnuih ƀôn sang amăng kual hăng jar kmar.