Truh ră anai, 10 boh tơring glông, plơi prong hơmâo pel ĕp, lăng glăi ƀing apăn bruă, mơnuih mă bruă; pơgiong hơdră ruah mơnuih apăn bruă amăng Khul gum bruă, Khul apăn bruă hăng Jơnum min pel ĕp ƀơi hơdôm boh să, phường tơdơi kơ pơmut hrŏm; laih dong prap lui djop gơnam măi mok, anih anom mă bruă. Khul apăn bruă Ping gah tơring čar hăng Ping gah Jơnum min mơnuih ƀôn sang tơring čar Kon Tum ăt pơkiăo nao lu grup pel ĕp sit nik kiăng pơhlôm brơi bruă dưm dăp anih anom brơi hruaih klă hloh, huăi ngă gun bruă mă, huăi lui pơ tlôn ƀon lan hơpă ôh.

Kơ-iăng Khua git gai Ping gah tơring čar Kon Tum Nguyễn Đức Tuy brơi thâo, bruă dưm dăp mơnuih apăn bruă kiăng “Djơ̆ mơnuih, djơ̆ bruă”, pơhlôm djơ̆ hơnong pơkă, lăp djơ̆ bruă jao hăng tŏ tui tơlơi gal, tơlơi dưl mơng rĭm boh să. Hơdôm anih kơƀah mơnuih apăn bruă, tơring čar amra kah pơpha, jao bruă brơi lăp djơ̆.