Tơdơi kơ Ding jum bruă čar hơmâo hră pơtô brơi 2 boh tơring čar Kon Tum, Quảng Nam pơkă glăi anih anom, guai lŏn tơnah ƀơi kual giăm să Trà Vinh, tơring glông Nam Trà My, tơring čar Quảng Nam hăng să Đăk Nên tơring glông Kon Plong, tơring čar Kon Tum, Jơnum min mơnuih ƀôn sang tơring čar Kon Tum rơkâo đĭ hăng Khua mua pơ ala mơnuih ƀôn sang pơsir brơi đut tơhnal hlao hơdôm tơlơi dŏ gun anun lĕ plơi pla, anih dŏ. Tui anun, Jơnum min mơnuih ƀôn sang tơring čar Kon Tum kiăng Jơnum min apăn bruă phun pơ ala mơnuih ƀôn sang dêh čar sem lăng, pơsit hơdră pơsir hĭ bruă mơnuih ƀôn sang să Trà Vinh, tơring glông Nam Trà My, tơring čar Quảng Nam dŏ hơdip ƀơi să Đăk Nên, tơring glông Kon Plong, tơring čar Kon Tum.

Kiăng pơsir hĭ, Jơnum min mơnuih ƀôn sang tơring čar Kon Tum ba pơƀuh 2 hơdră pơsir, hơmâo: Ba đuăi hră akŏ sang mơ̆ng 187 boh sang anŏ (1.034 čô mơnuih) pơ thôn 3, să Trà Vinh, tơring glông Nam Trà My, tơring čar Quảng Nam jao glăi kơ ƀôn prong Đà Nẵng wai lăng (tơdơi kơ Đà Nẵng pơmut hrŏm hăng Quảng Nam) ƀudah brơi mơnuih ƀôn sang pơmut pơ tơring čar Quảng Ngãi (tơdơi kơ pơmut hrŏm Quảng Ngãi hăng Kon Tum)./.