Him lăng amăng tal nao čuă jơmư sit nik dêh čar Armenia, ơi Trần Thanh Mẫn, amra bưp bơkơtuai hăng khua git gai pơ ala mơnuih ƀôn sang dêh čar Armenia laih anun hơdôm khua mua pơprong amăng dêh čar anai. Ơi Trần Thanh Mẫn tŭ jum Khul khua mua giăng mah Armenia hăng Việt Nam; čuă jơmư sang hră gưl prong dêh čar djă anăn Yerevan; nao pơhmư̆ mông bơkơtuai nao rai plah wah ƀing ngă bruă sĭ mơdrô Việt Nam hăng Armenia.

Tal nao čuă anai, ơi Trần Thanh Mẫn hăng bơnai ñu laih anun khul khua mua mơ̆ng dêh čar Việt Nam ƀu kơnong ngă kơjăp tui bruă giăng mah kơđi čar, sang bruă pơala mơnuih ƀôn sang đôč ôh, dŏ pok jơlan hơdră, pơtrut bơwih ƀong huă sĭ mơdrô, tuh pơ alin amăng djop bruă mơ̆ dua bơnah lêng kơ hơmâo tơlơi gêh găl prong kiăng ĕp mă; pơtrut ngă hrŏm djop bruă plah wah ding jum, anom bruă, tơring čar mơ̆ng dua bơnah kiăng ngă kơjăp tui bruă ngă giăng mah gru grua mơnuih ƀôn sang, pơtong rơđah anăp či ngă bruă hrŏm, kiăng ba glăi boh tŭ yua hiam klă kơ dua bơnah.