Găn rơgao 7 grup pơplông pơkŏn kiăng hơmâo tơlơi dưi amăng tal pơplông pơčeh pơkra rai gơnam pơpkra glăi djah kơsu yua Khul hlăk ai să pơphun, hră lơkak Việt Nam mơng khul hlăk ai ƀuôn Čuôr Dăng A pơdah tơlơi pơčeh phrâo. Ƀing hlăk ai hơmâo duñ mă asuk suk kiăng pơkra rai gơnam dưi mă yua rah hăng kiăng pơtô pơblang brơi mơnuih ƀôn sang rah. Amai H’Tuyết Niê, Khua khul hlăk ai ƀuôn Čuôr Dăng A, să Čuôr Dăng, tơring glông Čư̆ Mgar brơi thâo:

“Nao pơplông tal anai, khul hlăk ai ƀuôn gơmơi ba rai hră lơkak Việt Nam hơmâo pơkra rai mơng asuk ruk, djah djâo yua amăng tơlơi hơdip rĭm hrơi anun lĕ hră pơ-ar, đing hrĭp, akŏ get hăng hơdôm gơnam yua pơkŏn. Gơnam pơkra rai kiăng pơdah pran khăp plơi pla, lŏn ia, kah hăng pran pơ-ư ang djuai ania, tơlơi ngă pô hăng rơnuk rơnua lŏn ia. Mơng anun, kâo pô ăt lĕ rơnuk hlăk ai amra tŏ tui gir run pơkrăm kâo pô kiăng pơjing hăng wai pơgang lŏn ia kjăp”.

Hrŏm hăng hơdôm tal pơplông, ngui bơrơguăt drơi jăn, blan hlăk ai thun anai ƀơi Dak Lak hơmâo lu bruă mă tum pơƀut lu mơnuih, hơdôm bruă djru mơnuih mơnam. Hăng anăn “Hlăk ai ba jơlan hlâo, gum djru yua kơ tơlơi hơdip mơnuih mơnam”, lu bruă mă hơmâo pơphun ha amăng plĕ đơ đam tơring čar anun lĕ hrơi tơjuh mơtah, hrơi djru man pơdong plơi prong rơgơi, pok pơhai hơdôm grup pơplih yua boh thâo phrâo amăng ƀon lan.

Hrŏm hăng hơdôm bruă hrŏm yua khul hlăk ai gưl glông pok pơhai, grup ăt ngă pok pơhai ngă lu ring bruă, bruă mă sit nik, lăp djơ̆ hăng tơlơi sit nik amăng ƀon lan, anih anom mă bruă. Amai H’Vinh Êban, khua khul hlăk ai ƀuôn Kroa B, să Čuôr Dăng, tơring glông Čư̆ Mgar brơi thâo, giăm 300 met jơlan hla kơ lŏn ia hơmâo hlăk ai man pơkra kiăng pioh hơdor hơdôm hrơi ngă yang pơprong amăng blan 3. Hrŏm hăng anun, hlăk ai ăt gir run mut hrŏm rơmet pơagaih jum dar, trơ̆i koh kyâo pơtâo, duñ pơƀut asuk ruk ƀơi hơdôm pin ia Ea Mkang hăng pla kyâo ƀơi sa, dua kual plơi pla.

“Kâo hrŏm hăng ƀing hlăk ai pơkŏn hơmâo djru man pơkra jơlan hla kơ hlăk ai, pla bơnga hla pơ-ar hăng pơphun rơmet pơagaih ƀơi pin ia. Mơng hơdôm bruă anai, kâo ƀuh mơ-ak biă mă yua dưi pơgôp pran amăng bruă man pơkra hơdôm ring bruă, bruă mă mơng hlăk ai amăng plơi pla”.

Tui ayong Y Lê Pas Tơr, Kơ-iăng khua khul hlăk ai tơring čar, Khua khul pơlir hơbit hlăk ai Việt Nam tơring čar Dak Lak, găn rơgao 3 wŏt hrơi tơjuh pok pơhai hơdôm bruă amăng blan hlăk ai, hơmâo laih giăm 220 grup gum djru, hơmâo man pơkra rơbêh 200 ring bruă, bruă jao amăng hơdôm boh plơi pla. Giăm 160 grup pơtô mơnuih ƀôn sang yua boh thâo phrâo hơmâo akŏ pơjing, mut hrŏm djru yua boh thâo phrâo brơi mơnuih ƀôn sang. Hlăk ai đơ đam tơring čar ăt pơgôp prăk kak, hrơi mă bruă djru man pơdong 25 boh sang tui jơlan hơdră gum tơngan hrŏm ruh pơkra glăi sang tơ̆i rơ̆i, sang dŏ jang jai.

Tơlơi pơplih phrâo mơng blan hlăk ai thun anai lĕ hơdôm bruă mă pok pơhai hluai tui tal pơplông gum tơngan hrŏm ruh pơkra glăi sang tơ̆i, sang dŏ jang jai; ngă tui tŭ yua tơlơi pơtrun mrô 57-NQ/TW mơng ding jum kơđi čar kơ pơtrut pơđĭ kyar boh thâo phrâo, pơplih pơčeh phrâo hăng pơplih mrô dêh čar hluai tui bruă pơtô ba mơnuih ƀôn sang yua boh thâo phrâo. Tơdơi kơ tŭ mă boh tơhnal anai, djop gưl khul hlăk ai hơmâo akŏ bruă tong ten, ngă kiăo tui mơng hrơi blung a mơtăm.

“Akŏ pơjing hơdôm hơnong pơkă phara brơi blan hlăk ai, kiăo tui anăn pơphun amăng thun kah hăng hơdôm bruă mă amăng blan tlâo. Kah pơpha hơdôm hơnong pơkă tong ten brơi hơdôm khul hlăk ai tơring glông, plơi prong hăng khul hlăk ai pơkŏn, git gai akŏ pơjing grup mă bruă tui rĭm gưl, ba glăi tơlơi pơtrut ha amăng plĕ amăng đơ đam tơring čar. Ƀing gơmơi amra gir run mă yua lu ƀiă dong amăng yua boh thâo phrâo hơdôm bruă mă kiăng pok pơhai brơi klă hloh, tañ hăng tŭ yua hloh tơl ƀing ding kơna hlăk ai”.

Blan hlăk ai thun 2025 pơđut hĭ hăng hơdôm tơlơi kơđŏm glăi mơng hlăk ai djuai ania kual Dap kơdư-pran jua hur har, gơgrong hăng abih pran ngă bruă. Hơdôm ring bruă hlăk ai, hơdôm bruă gum djru ƀu djơ̆ kơnong ba glăi tơlơi dưi sit nik kơ mơnuih mơnam đôč ôh mơ̆ ăt pơtrut pơsur pran gum pơgôp, pran pơ-ư ang hăng gir run pơjing plơi pla. Yôm hloh hăng mrô jŭ yap, anun lĕ tơlơi hok mơ-ak, gum tơngan hrŏm hăng pran jua hur har ngă bruă.

Bruă gum djru mơng hlăk ai amra ƀu djơ̆ kơnong amăng blan hlăk ai đôč ôh mơ̆ ăt amra tŏ tui lar hyu amăng hơdôm bruă đơđet rĭm hrơi, pơgôp pơjing kual Dap kơdư jai hrơi pơđĭ kyar hơđong kjăp, hiam klă. /.