Đĭ pơhiăp amăng mông mă bruă, Khua dêh čar ơi Phạm Minh Chính brơi thâo, hơdôm akŏ bruă pơkŏng glăi lu biă mă hăng sui hrơi truh thun anai, lơm glăk pơplih hơnong pơkă pơđĭ kyar gir run rơbêh 8% amăng thun anai hăng dua mrô amăng hơdôm thun pơ anăp, kiăng gir run kơtang hloh, gir run prong ƀiă dong, amăng anun hơmâo pơsir hĭ khut khăt  hơdôm akŏ bruă dŏ pơkŏng glăi, ngă bruă ƀu klă. Khua dêh čar brơi thâo, Ding jum prăk kak hơmâo dưm dăp, kah pơpha rơbêh 1 rơbâo 500 akŏ bruă tơnap tap, gun găn, samơ̆, bruă lăi pơthâo aka ƀu lăp djơ̆.

Khua dêh čar rơkâo pơsir hĭ gun gun găn hăng pran jua gir run kơtang hloh, gir run prong ƀiă dong, ngă bruă khut khăt, tong ten, lăp djơ̆. Tŏ tui pel ĕp, pơjing jơlan gah, hơdră bruă pơsir hĭ hlâo 1 mrô amăng grup bruă mă amăng anun hơmâo đong nao ruah hơdôm akŏ bruă tuh pơ alin man pơdong, akŏ bruă tuh pơ alin tui hơdră PPP (pơkôl kơplah wah kơnuk kơna hăng anom bơwih ƀong sĭ mơdrô kiăng pok pơhai akŏ bruă).