Khul apăn bruă Ping gah Cộng sản Việt Nam, Khua pơ ala mơnuih ƀôn sang dêh čar Việt Nam, Khua mir sir, Kơnuk kơna dêh čar Việt Nam, Jơnum min djop djuai ania mơnuih mơnam Việt Nam lăi pơthâo: Ơi Khamtay Siphandone; tơkeng lơ 8/2/1924; Khua mir sir, Khua dêh čar hơđăp, Kơ-iăng khua dêh čar, Khua ding jum ling tơhan dêh čar Lao hơđăp rơngiă lơm 10 mông 30 mơnit, lơm 101 thun laih. Ơi Khamtay Siphandone lĕ sa amăng ƀing khua mua ba jơlan hlâo amăng bruă pơjing jơlan ngă hơkrŭ ƀơi dêh čar Lao. Ñu hrŏm hăng ƀing khua mua pơkŏng pơphun, git gai bruă ngă hơkrŭ hăng ba glăi lu tơlơi dưi prong, ba bruă ngă hơkrŭ ƀơi dêh čar Lao truh kih, ƀơƀrư̆ ba lŏn ia Lao kjăp pran yak nao hơnong pơkă tui Chủ nghĩa xã hội. Ñu lĕ gơyut gơyâo jê̆ giăm hăng Ping gah, kơnuk kơna, mơnuih ƀôn sang Việt Nam, lêng kơ đing nao hăng hơmâo lu tơlơi gum pơgôp prong prin, pơgôp yôm amăng bruă pơjing, hơkrŭ hăng pơđĭ kyar tơlơi rô nao rai giang mah hing ang, gum pơgôp yôm phăn, ngă hrŏm djop mơta Việt Nam-Lao amăng thun blan rơgao. Ñu rơngiă jing tơlơi rơngiă prong biă mă hăng dêh čar Lao hăng tơlơi rô nao rai Việt Nam - Lao.

Kiăng pơdah pran hning rơngô̆t hrŏm ơi Khamtay Siphandone hăng mơng tơlơi rô nao rai yôm phăn kơplah wah Việt Nam-Lao, Khul apăn bruă Ping gah Cộng sản Việt Nam, Khua pơ ala mơnuih ƀôn sang dêh čar Việt Nam, Khua mir sir, Kơnuk kơna Việt Nam hăng Jơnum min djop djuai ania mơnuih mơnam Việt Nam pơsit mơyut jôk kơ ơi Khamtay Siphandone tui hơdră mơyut jôk gưl dêh čar amăng 2 hrơi, dong mơng lơ 4-5/4/2025.

Amăng hơdôm hrơi anai, hơdôm anom bruă, sang bruă amăng đơ đam dêh čar hăng hơdôm anom bruă pơ ala dêh čar Việt Nam pơ tač rơngiao yôl hla kơ kru, tui tơlơi pơkă, ƀư dưi pơphun hơdôm tơlơi ngui ngor amăng mơnuih mơnam.