Mơ̆ng rơbêh kơ ha mơkrah blan anai ơi A Kiêu, plơi Kon Long, să Đăk Tơ Lung, tơring glông Kon Braih, tơring čar Kon Tum dik dăk tơlơi mơ-ak. Dŏng amăng sang glăk rơwang giăm giong ñu lăi pơdah, sang hmâo 6 čô mơnuih wot tha rơma hăng čơđai muai, sang hơđăp giăm anun tơ̆i rơgao đơi anun lơm hơjan khom ruah kah mơ̆ng hmâo anih dô̆ huăi djơ̆ ia hơjan pioh đih pit. Dưi hmâo Khua git gai Ping gah A Tẻ pơsur, abih bang sang ơi A Kiêu phing kơpran jua yak rơgao rơlơi bơngot “sang pô ƀu hmâo hơget” pioh pơdŏng sang phrâo:

“Hlâo adih sang anô̆ kâo hơdip amăng sang pơdŏng mă jăng jai, sang tơ̆i, adai hơjan lĕ pơsah abih ƀu hmâo anih pioh đih pit. Ră anai hmâo sang pô dưi hmâo kơnuk kơna djru 60 klăk prăk pioh pơdŏng sang phrâo. Laih anun neh wa djru sang kâo nao mă, pơgiăng bôh pơtâo, čuah, ga glăi pơ̆ sang. Hmâo sang dô̆ brơi tom ximăng, djru pơkra brơi đôč. Sang phrâo pơdŏng ƀiă giong laih bơyan hơjan thun anai abih bang sang kâo hơđong pran jua biă”.

Ngă tui bruă pơphun bơkơtưn gum tơngan hrŏm lŏm lui sang dô̆ jăng jai, sang tơ̆i, Grŭp ping gah plơi Kon Long pơsit amăng plơi hmâo 2 bôh sang anô̆ kiăng djru pơdŏng sang phrâo anun lĕ sang anô̆ A Kiêu hăng amai Y Seng. Mơ̆ng bruă ba jơlan hlâo djru 2 bôh sang anô̆ mơnuih ƀôn sang pơkra sang dô̆ mơ̆ng 9 čô mơnuih ping gah amăng grŭp, 96 bôh sang anô̆ mơnuih ƀôn sang amăng plơi tŭ ư hrŏm ngă tui. Khua git gai Ping gah A Tẻ, brơi thâo, kơnang kơ iâo pơhrui hmâo tơlơi gum tơngan hrŏm, gum pran mơ̆ng ană plơi hăng pran jua “Sang hơpă hmâo hơget djru anun”, rim sang dưi hmâo kơnuk kơna djru 60 klăk prăk samơ̆ bôh nik nua pơdŏng đĭ truh ha rơtuh klăk prăk. Sang mơ̆ng 2 bôh sang anô̆ mơnuih ƀôn sang tơnap tap hloh plơi yua anun ăt klă hiam, kơjăp phik hloh mơn:

“Neh wa hur har pran jua djru gum hơdôm bôh sang anô̆ tơnap tap. Djru gum dưm kơnar, djru ruh sang, klơi atur sang. Hơdôm khul grŭp plơi pơsur neh wa djru prăk mơta rim sang gum pơčruh 5 rơbâo prăk. Neh wa djru pơgiăng gơnam man pơkra, djru dŭ geč. Neh wa gum djru hur har pran jua biă”.

Tơring čar Kon Tum hmâo 2.752 bôh sang pơdŏng jăng jai, amăng anun tơlơi kiăng pơdŏng sang phrâo giăm truh 2.200 bôh sang hăng pơkra glăi sang răm rơbêh kơ 560 bôh sang. Bôh nik ñu ngăn drăp mơ̆ng tơring čar ƀu pơhlôm, lu sang anô̆ ƀơi kual asuek, ataih, tơnap tap amăng dŭ pơgiăng, tum pơƀut gơnam man pơkra... Grŭp črâo ba pok pơhai lŏm lui sang tơ̆i, sang răm hơdôm gưl mơ̆ng tơring čar Kon Tum hmâo lăng yôm bruă ba jơlan hlâo, ngă gru hlâo mơ̆ng rim mơnuih ping gah hăng gưl ping gah amăng gum djru, djru sang anô̆ mơnuih ƀôn sang pơdŏng, pơkra glăi sang răm. Ơi Nguyễn Văn Thuỷ, Kơ-iăng Khua Jơnum min mơnuih ƀôn sang tơring glông Kon Braih, brơi thâo, ƀu kơnong kơ djru mơnuih ƀôn sang hăng tơlơi pơtă pơtăn, djru hơdră mă yua măi mok pơdŏng, ƀing Khua git gai Ping gah hăng mơnuih ping gah amăng tơring glông dô̆ iâo pơthưr gum pơčruh, iâo pơhrui hơdôm ngăn rơnoh pioh hơdôm bôh sang dưi pơdŏng, pơkra glăi sang răm klă hiam, kơjăp phik hăng nua ñu lu hloh rơnoh djru:

“Gah yŭ tơlơi git gai črâo ba mơ̆ng Ping gah tơring glông, Grŭp apăn bruă Ping gah tơring glông hyu mă bruă lŏm lui sang tơ̆i, sang răm dưi hmâo tơlơi tŭ ư hrŏm gum hrŏm mơ̆ng mơnuih apăn bruă, mơnuih ping gah laih anun mơnuih ƀôn sang hăng plơi pla anih anom dô̆. Mơnuih apăn bruă, mơnuih ping gah nao rim sang djru, gum ba”.

Bôh nik brơi ƀuh rơbêh 440 čô Khua git gai Ping gah ngă rah Khua plơi, Khua grŭp mơnuih ƀôn sang hrŏm hăng ha rơbâo čô mơnuih ping gah mơ̆ng tơring čar Kon Tum hmâo gum hơgôp sit nik, ba glăi bôh tơhnal amăng gir run lŏm lui sang tơ̆i, sang răm kơ mơnuih ƀôn sang. Truh rơnuč blan 3, tơring čar Kon Tum pơdŏng giong sang phrâo, pơkra glăi sang răm abih bang 1.776 bôh sang. Ơi Nguyễn Khắc Thời, Khua git gai Ping gah ngă rah Khua plơi Kon Jri Xút, să Đăk Blà, plơi prong Kon Tum lăi pơthâo:

“Grŭp ping gah hmâo 9 čô mơnuih ping gah phun ñu lĕ mơnuih ping gah ƀơi anai. Mơnuih ping gah khom pô ba gru hlâo djru kơ mơnuih ƀôn rin lŏm lui sang tơ̆i, sang răm. Mông kơkuh khăn gru rim rơwang hrơi tơjuh, rim blan grŭp ping gah lăi pơhing pơsur mơnuih ƀôn sang djru pran djru lŏm lui sang tơ̆i, sang răm”.

Ơi Nguyễn Duy Lơ, Khua git gai Ping gah ngă rah Khua plơi Đăk Tang, să Rờ Kơi, tơring glông Sa Thầy, brơi thâo:

“Hăng bruă mă lĕ sa Khua git gai Ping gah grŭp – Khua plơi kâo pơsur neh wa amăng plơi hăng hlăk ai nao djru gum neh wa hlơi hmâo hơget djru anun, hmâo pran lĕ djru pran, hmâo gơnam lĕ djru gơnam. Pơ alin hăng prăk mơ̆ng gưl dlông djru sang anô̆ dưi pơdŏng sang klă hiam hloh, kơjăp hloh pioh neh wa hơđong pran jua mă bruă ngă đang hmua amăng hơdôm bơyan hơjan pơ̆ anăp”.

Bruă pơphun bơkơtưn “Gum tơngan hrŏm lŏm lui sang tơ̆i, sang răm amăng đơ đam dêh čar amăng thun 2025” yua kơ tơring čar Kon Tum pok pơhai ngă tui ƀu kơnong kơ pơdơi glăi ƀơi bruă pơplih hơdră sang dô̆ ôh mơ̆, ñu dô̆ jing sa črăn yôm phăn amăng bruă pơdŏng hăng hơkrŭ pran đăo kơnang mơ̆ng mơnuih ƀôn sang pioh kơ Ping gah. Hơdôm bruă mă rơđah, sit nik mơ̆ng ƀing Khua git gai Ping gah hăng mơnuih ping gah ƀơi Kon Tum hmâo pơdah rơđah bruă ba jơlan hlâo, pran gơgrong mơ̆ng mơnuih ping gah amăng bruă bơwih brơi tơlơi hơdip mơda kơ hơdôm bôh sang anô̆ mơnuih ƀôn sang dô̆ tơnap tap. Tơring čar Kon Tum hrưn đĭ truh rơnuč blan 6/2025 amra pơdŏng giong sang phrâo, pơkra glăi sang răm, djru abih bang hơdôm bôh sang anô̆ tơnap tap amăng tơring čar hmâo tơlơi hơdip mơda klă hloh hăng hơđong pran jua hlâo kơ bơyan hơjan kơthel truh.