Jơlan mrô 1 tơring čar Dak Nông, črăn găn nao pơ plơi thôn 3, să Quảng Tâm, tơring glông Tuy Đức, ră anai răm kơtang ƀlung hup prong hloh kru rơman, hruh kơbao mơtam yơh, ƀơi anŏ plung hup prong hơdôm met, rơdêh nao rai ia gôm pông rơdêh mơ̆n. Ƀơi črăn, hơmâo tuh kơsu atur jơlan čơđang tơhư, pơčah prong laih, ngă hơñueng čơčrih hŭi rơhyưt biă mă tơdah bơrơbưh thâo. Lơ̆m khul rơdêh rô nao rai ƀơi črăn jơlan răm anai, bơyan phang lŏn ƀui mơmŏt mơtam, bơyan hơjan hlŭ dơlut tơnap biă mă, añ suă pran mơtam sit găn nao. Ơi Trương Anh Bằng, pô sang sĭ mơdrô mơnong ƀong huă ƀơi Quảng Tâm brơi thâo, jơlan răm tui anun sui thun laih. Mah rim thun ăt ming pơkra glăi, samơ̆ kơnong hơdôm blan tơdơi kơ anun, răm glăi dơ̆ng.

“Sang gơmơi sĭ mơdrô mơnong ƀong huă pơ anai, krư̆ bah amăng na nao đôč, mơnil măi hip pơrơ-ot ƀruih hăng ƀui găm hmik lŏn soh, tơma amăng mơnong ƀong. Kơƀang grê khom sut uă na nao 2-3 wơ̆t rim hrơi ăt ƀu abih lơi. Lu amĭ ama čơđai sang hră pơgiăng ană bă nao sang hră, găn nao pơ anai, hmik hmak, amĕ amŏ ƀô̆ mơta ia hlŭ ngă, sum ao ƀrê ƀra lŏn kơdah djơ̆. Ƀing ană amôn nao sang hră đĭ rơdêh pơkĕ apui lơtrik ăt hnun mơ̆n, kâo khom dưm lui kơthung ia pioh ƀing čơđai hăng amĭ ama pač ƀô̆ mơta gơñu. Arăng čuk pơkra glăi laih samơ̆ jơlan ăt răm na nao đôč”.

Jơlan mrô 1 tơring čar Dak Nông răm kơtang laih, ƀu kơnong bơbeč djơ̆ kơ bruă sĭ mơdrô hăng tơlơi dŏ dong ƀong huă mơ̆ng mơnuih ƀôn sang đôč ôh, dŏ ngă kơ rơdêh ană plơi rô nao rai ăt răm tui mơ̆n, ngă huač lu prăk kăk ming pơkra glăi. Ayong Nguyễn Kim Toàn, sa čô mơnuih mơgăt rơdêh lăi:

“Kâo nao mơ̆ng Quảng Tân truh pơ Dak Rtih ƀudah pơ hơdôm să pơkŏn hai, rơngiă mông hăng prăk kăk blơi ia săng đĭ lu hloh 2-3 wơ̆t pơkă hăng hlâo adih. Klâo kơ anau lĕ, kâo kơnong tuh 3-4 lit ia săng, ia jâo samơ̆ ră anai khom huač truh 9 ƀudah 10 lit kah djop. Hlâo adih hă, jơlan hiam, dơnar, pơblih pông rơdêh sa thun truh 1 thun mơkrah kah pơhrua, ră anai, kơnong 7-8 blan khom pơblih mơtam".

Jơlan mrô 1 tơring čar Dak Nông kah hăng jơlan phun pơtruh nao rai tơring glông Tuy Đức hăng Dak Rlâp, tơkuh nao pơ jơlan amur Hồ Chí Minh hăng jơlan dêh čar mrô 14 C, nao truh pơ amăng jang jơlan guai či Bu Prăng nao pơ dêh čar Kur, hơmâo gơgrong ba prong biă mă amăng bruă rô nao rai pơdŭ pơgiăng gơnam tam, pơtrut bơwih ƀong huă mơnuih mơnam hăng pơgang rơnuk rơnua dêh čar ƀơi tơring glông giăm guai Tuy Đức. Phun ñu ngă kơ jơlan anai răm yua kơ rơdêh nao rai lu, pơdŭ pơgiăng gơnam kơtrâ̆o, rơdêh pơgiăng tuai ăt lu mơ̆n hơdôm thun giăm anai, lơ̆m anun bruă ming pơkra glăi jơlan rim thun kơƀah na nao.

Ơi Dương Huy Toàn, Khua git gai ping gah tơring glông Tuy Đức, brơi thâo, tơring glông hơmâo ngă hră mơ-it đĭ kơ Jơnum min mơnuih ƀôn sang tơring čar Dak Nông hăng Ding jum Man pơdong, rơkâo djru prăk pioh pơkra glăi jơlan. Ră anai, tơlơi rơkâo hlăk sem glăi hăng pơsit brơi ngă, kơnong tơguan djop hră pơar đôč.

“Tơring čar hlăk kơsem lăng, brơi mă yua rơnoh prăk mơ̆ng gơnong dlông pioh pok pơhai pơkra glăi jơlan anai. Jơlan hơdră hơmâo laih prăk kăk ăt hơmâo mơ̆n, hơdôm mơta hră pơar hlăk pok pơhai, sem glăi pơphun mă bruă đôč dŏ tơguan, kiăng rơnuč thun anai amra tơgŭ mă bruă ming pơkra glăi jơlan anai”.