Mơguah kơ 16/4, ha rơbâo čô mơnuih apăn bruă, mơnuih ping gah tơring čar Kon Tum pơhmư̆ mông Jơnum đơ đam dêh čar lăi pơthâo, pok pơhai ngă tui Tơlơi pơtrun pơsit Jơnum tal 11 Grŭp mă bruă Ping gah dêh čar tal 13 lăng nao rai mơ̆ng ataih. Ngă gal brơi pioh mơnuih ping gah dưi tŭ mă tơlơi pơhing, Kon Tum pơphun 121 bôh anih tô nao rai gưl tơring čar truh gưl să. Gơgrong hlâo pok pơhai ngă tui Tơlơi pơtrun pơsit Jơnum tal 11, hlâo kơ anun, ƀơi tơring kual Măng Đen, tơring glông Kon Plông, Grŭp apăn bruă Ping gah tơring čar Kon Tum hăng Quảng Ngãi hmâo pơphun Jơnum pok pơhai hơdră pơtrun mơ̆ng Ping gah dêh čar kơ pơmut hrŏm tơring čar. 2 tơring čar tŭ ư hrŏm akô̆ pơjing 6 Grŭp hyu mă bruă pioh tañ ngă tui hơdôm bôh yôm bruă jao.

Jơnum min mơnuih ƀôn sang tơring čar Dak Lak hơmâo akŏ bruă pơphun mă tơlơi pơgôp hiăp mơng kư tri hăng boh tơhnal akŏ bruă dưm dăp, pơmut anih anom bruă gưl tơring čar, gưl să. Tui anun, bruă mă tơlơi pơgôp hiăp hơmâo pơphun tui hơdră ba hră pơ-ar tơl hơdôm boh sang anŏ. Hrơi mông pơphun mă tơlơi pơgôp hiăp ƀing kư tri lĕ lơ 20/4. Tơdơi anun, Jơnum min mơnuih ƀôn sang gưl să, tơring glông hăng gơnong bruă wai lăng anih anom mă bruă Dak Lak amra pơƀut glăi, lăi pơthâo, pơhlôm hrơi mông mơ-it nao Jơnum min mơnuih ƀôn sang djop gưl sem lăng dong mơng lơ 21 truh lơ 24/4. Jơnum min mơnuih ƀôn sang tơring čar Dak Lak rơkâo djop ƀon lan pok pohai khut khăt, djơ̆ tơlơi pơkă, pơhlôm brơi klă, tong ten hăng djơ̆ hrơi mông, mơng anun hơmâo tơlơi mut hrŏm mơng mơnuih ƀôn sang hăng bruă dưm dăp anih anom mă bruă amăng tơring čar.

Tơring čar Dak Nông ba tơbiă 8 tơlơi pơkă yôm phăn pioh pok pơhai dưm dăp glăi anom bruă čar gưl să hluai tui pơhlôm kơjăp, hmâo akô̆ tlôn, djơ̆ tơlơi pơkă blung a lĕ khom pơhlôm tơlơi git gai, pơhlôm akô̆ tlôn mơ̆ng Ping gah amăng abih bang bruă dưm dăp hơdôm bôh să. Tơlơi pơkă tal 2 lĕ ngă tui Phiah phiăn, tơlơi phiăn hăng tơlơi pơkă hmâo pơsit laih anun. 3 lĕ đing nao dưm dăp hơdôm bôh anom akă djơ̆ tui tơhnal pơkă kual ƀudah pơkă mrô mơnuih ƀôn sang tui tơlơi pơsit mơ̆ng Jơnum min apăn bruă Khua pơ ala mơnuih ƀôn sang.

Tơlơi pơkă tal 4 lĕ yap truh tơlơi pơkă kơ glai klô, anom mă bruă, anih anom pơđĭ kyar ngă tui đut hlah anô̆ gal ƀơi plơi pla tơdơi kơ pơmut hrŏm. 5 lĕ ƀu pơplih anăn gưl tơring glông. 6 lĕ bruă dưm dăp glăi anih anom mă bruă čar nao hrŏm hăng ngă giong glông bruă kơđi čar tui jơlan gah rơbô̆t, tŭ yua, ba glăi bôh tơhnal. 7 lĕ ƀu mă yua khăng khŏp tơhnal pơkă plơi prong phrâo. Sa tơlơi pơkă yôm phăn pơkon Dak Nông ba tơbiă lĕ ngă klă bruă lăi pơhing, pơsur, mă tơlơi gum pơhiăp mơnuih ƀôn sang pioh gal brơi tơlơi tŭ ư, pơlir hơbit prong amăng mơnuih mơnam kơ dưm dăp glăi gưl să./.