Amăng mông jơnum, ƀing pơ ala hơdôm anom bruă wai lăng kơnuk kơna, ƀing rơgơi bơwih ƀong huă, anom bơwih ƀong sĭ mơdrô hăng hơdôm anom bơwih ƀong hrŏm hơmâo ba tơbiă lu hơdră bruă kiăng pơtrut pơđĭ kyar hơbô̆ bruă bơwih ƀong mơtah, mă yua djop gơnam tam, pơhrŏ ƀiă asăp hơƀak, kah hăng hrưn đĭ pran bơkơtưn amăng kual bơwih ƀong ngă hrŏm. Kơ-iăng Khua dêh čar ơi Nguyễn Chí Dũng lăi pơtong, bruă pơplih mơtah jing tơlơi rơkâo hăng djop anih anom bơwih ƀong.

Kơnuk kơna ƀuăn amra gum hrŏm, pơtrut kơtang hluai tui lu hơdră bruă kiăng kual bơwih ƀong ngă hrŏm hrưn đĭ, pơđĭ kyar tui jơlan gah phrâo hăng tŭ yua. Kơ-iăng Khua dêh čar rơkâo pơ anăp anai, djop ding jum, gơnong bruă hăng gong gai ƀon lan pok pơhai tŭ yua hơdôm hơdră bruă, amăng anun hơmâo tơlơi pơtrun mrô 57 kiăng pơplih yua boh thâo phrâo, mă yua boh thâo măi mok amăng bruă mă mơng anom bơwih ƀong hrŏm.