Amăng hơdôm hrơi rai čuă, ơi Tập Cận Bình hơmâo hơdôm mông jơnum bơkơutuai hăng khua mua pơprong amăng Ping gah, Ƀirô Khua pơ ala mơnuih ƀôn sang dêh čar, Kơnuk kơna Việt Nam. Dua bơnah tŭ ư kiăng pơtrut ngă giang mah kơplah wah Việt Nam-Khač. Dua bơnah ăt tŭ ư ngă tui klă tơlơi gơgrong amăng “Tơlơi pơkôl ngă hrŏm bơwih ƀong huă djop mơta amăng kual” (RCEP) hăng tơlơi pơkôl sĭ mơdrô rơngai kual ASEAN-Khač (ACFTA) pơtrut sĭ mơdrô dua bơnah pơđĭ kyar tui jơlan gah bơkơnar.

Kơtưn git gai, gum hrŏm amăng hơdôm bruă tui jơlan gah djop bơnah, anun lĕ amăng sang gum hơbit djop dêh čar, Khul ngă hrŏm bơwih ƀong kual Asia-Thái Bình Dương (APEC), Khul ngă hrŏm Asia-Mi kô̆ (ASEM), Khul hơdôm boh dêh čar kual Ngŏ dơnung Asia (ASEAN), dong yua tơdruă lơm ruah pơmut ngă bruă amăng hơdôm khul grup jar kmar. Dua bơnah tŭ ư wai lăng hăng pơsir hĭ klă hloh bruă bơrơjah, djă pioh tŏ tui ngă giang mah Việt Nam-Khač.

Amăng tal rai čuă, dua bơnah hơmâo kĭ hơdôm hră pơ-ar ngă hrŏm amăng djop mơta bruă hơmâo tơkuh nao rai jơlan glông, jơlan rơdêh treng, wai pơgang klin kman lơm găn nao rai dua bơnah, sĭ mơdrô gơnam đang hmua, bruă ling tơhan, boh thâo ia rơgơi, gru grua, bơrơguăt drơi jăn, pơtô pơjuăt, djru mơnuih mơnam, mơnuih mă bruă, pôr pơhing hăng ngă hrŏm hơdôm boh ƀon lan….Khua git gai Ping gah, Khua mir sir ơi Tập Cận Bình pơpŭ bơni kơ tơlơi čơkă yôm phăn hăng giang mah; jak iâu Khua git gai Ping gah ơi Tô Lâm hăng Khua mir sir ơi Lương Cường nao čuă dêh čar Khač tañ hloh tơdah dưi.