Hơdôm hrơi anai, ƀơi Anih dŏ phrâo Ân Phú, phường Tân Lợi, plơi prong Buôn Ma Thuột, hơdôm hơpluh čô mơnuih luh nao sĭ hăng blơi, ngă lŏn mơnai đĭ tui ƀơƀrư̆ rĭm hrơi. Dua blan hlâo anun, sa blah lŏn prong 100 met karê ƀơi anai sĭ giăm 2 klai prăk, mơ̆ ră anai truh pơ 2,5 klai prăk. Ƀu djơ̆ kơnong lŏn mơnai ƀơi anih dŏ phrâo đĭ kơtang, mơ̆ lŏn mơnai ƀơi hơdôm boh phường, să hăng kual jum dar plơi prong Buôn Ma Thuột ăt đĭ giăm 20%.

Yă Phạm Thị Thanh, dŏ amăng phường Đạt Hiếu, plơi prong Buôn Hồ, tơring čar Dak Lak brơi thâo: ană đah rơkơi hăng ană atâo ñu glăk mă bruă amăng hơdôm anom bruă kơnuk kơna ƀơi Phú Yên. Tơdah dua boh tơring čar pơmut hrŏm, dua gơñu amra rai pơ Buôn Ma Thuột mă bruă hăng dŏ hơdip. Yua anun sang anŏ yă Thanh glăk ĕp lŏn mơnai kiăng kơ man pơdong sang.

“Hmư̆ hing amra pơmut hrŏm tơring čar giăm 2 blan anai, kâo nao pơ anih dŏ phrâo Ân Phú tơña blơi 100 met karê, ƀing gơñu lăi 2 klai prăk, kâo dŏ pơmĭn anun aka blơi ôh. Samơ̆ lơm hơmâo tơlơi pơhing sit nik pơmut hrŏm tơring čar Dak Lak hăng Phú Yên, kâo nao tơña, ƀing gơñu lăi 2,6 klai prăk. Nua đĭ kơtang, samơ̆ lu mơnuih apăn bruă mơng Phú Yên kiăng hơđong anih dŏ anun kiăng blơi lŏn man pơdong sang. Yua anun kâo amra gir blơi yơh, yua kơ hŭi lŏn amra đĭ dong”.

Ơi Phan Thái Bình, Khua sa boh kông ti sĭ mơdrô lŏn sang ƀơi Buôn Ma Thuột brơi thâo, hăng 100 čô mơnuih mă bruă, rĭm hrơi kông ti hơmâo ngă brơi giăm 20 hră pơkôl sĭ lŏn sang. Pơhmu hăng rơwang tơnap tap amăng rơnuč thun 2022, anai lĕ nua sĭ mơdrô đĭ đăi ƀiă.

“Sit biă ñu, bruă sĭ mơdrô lŏn sang ƀơi Dak Lak glăk pơplih ƀiă pơhmu hăng hlâo adih. Mơnuih kiăng blơi lŏn sang đĭ tui, ha bơnah lĕ yua kơ bruă lui hĭ gưl tơring glông, ƀing apăn bruă hơmâo jao bruă pơ să, sa, dua pơkŏn dong nao mă bruă pơ Buôn Ma Thuột. Hrŏm hăng anun, lu mơnuih tha rơma pơdơi lơtret čang rơmang glăi pơ Buôn Ma Thuột dŏ hơdip. Laih dong, tơdơi kơ tơlơi pơhing pơmut tơring čar, hlâo anun hơmâo ƀing mơnuih mơng Dak Nông rai blơi lŏn, ră anai tŏ tui hơmâo mơnuih mơng Phú Yên dong. Ƀing gơñu lêng kơ kiăng lŏn dŏ soh”.

Tui jŭ yap mơng anom bruă ngă hră pơ-ar lŏn mơnai-gơnong bruă ngă hmua hăng ayuh hyiăng lŏn mơnai tơring čar Dak Lak brơi thâo, amăng rơwang thun I thun 2025, hơdôm anih amăng anom bruă anai hơmâo čơkă hăng ngă brơi hră pơ-ar lŏn mơnai kơ giăm 75.000 čô mơnuih, đĭ rơbêh 17% pơhmu tui tơđar thun hlâo.

Ơi Hoàng Xuân Phương, kơ-iăng Khua anom bruă ngă hră pơ-ar lŏn mơnai brơi thâo, mrô hră pơ-ar lu biă mă ngă kơ sa, dua anom bruă ƀơi plơi prong Buôn Ma Thuột hăng tơring glông Čư̆ Mgar ngă brơi hră pơ-ar ƀu hmao ôh:

“Anom bruă ngă brơi hră pơ-ar lŏn mơnai hơmâo git gai hơdôm anih pok pơhrua dong anih tŭ mă hră pơ-ar hăng pơhlôm sui ƀiă bruă mă kiăng djru brơi mơnuih ƀôn sang, anăm brơi ƀing gơñu dŏ tơguăn sui. Laih dong, mơng lơ 1/4, ƀing gơmơi pok pơhai hơbô̆ bruă pơlir mơng ataih kiăng djru ngă hră pơ-ar kơplah wah anom bruă mă jia hăng anom bruă pơsit brơi hră pơ-ar, djru ngă bruă online. Blung hlâo, hơbô̆ bruă anai ba glăi boh tŭ yua sit nik, dưi ngă brơi hră pơ-ar tañ hloh”.

Bruă sĭ mơdrô lŏn sang pơđĭ kyar kơtang ƀơi Buôn Ma Thuột hơdôm hrơi rơgao lĕ tơlơi amra ƀuh tơdơi kơ hơmâo tơlơi črâo trun pơmut hrŏm tơring čar, lơm ƀơi anai arăng ruah anih mă bruă phun kơ tơring čar Dak Lak phrâo. Hrŏm hăng mrô mơnuih apăn bruă, mơnuih mă bruă tui nao anih mă bruă phun, Buôn Ma Thuột hăng kơdrưh phrâo amra pơhưč dong lu sang anŏ, khul grup hăng anom bơwih ƀong sĭ mơdrô./.