Tui hăng kual pơkă jơlan rơwang 2021-2030, tơhnal lăng truh thun 2050, jơlan đuăi hmar Quảng Ngãi – Kon Tum ataih 136 km, prong 4 glông jơlan đuăi, bruă mă yua prăk pơkra hlâo kơ thun 2030. Ră anai gong gai 2 bôh tơring čar Kon Tum hăng Quảng Ngãi hmâo jơnum hăng tŭ ư hrŏm ba tơbiă Ding jum man pơdŏng jơlan đuăi hmar hăng abih bang prăk mă yua giăm truh 35.400 klai prăk, gah ƀut rơwang bruă yôm phăn lŏn ia.

Tui hăng tơlơi ba tơbiă, jơlan đuăi hmar Quảng Ngãi – Kon Tum găn 5 bôh anih anom lĕ plơi prong Đức Phổ, tơring glông Ba Tơ (ataih 58km gah tơring čar Quảng Ngãi) hăng 3 bôh tơring glông lĕ Kon Plông, Kon Braih hăng plơi prong Kon Tum (ataih 78km gah tơring čar Kon Tum). Jơlan đuăi hmar pơkă hlâo hmâo 4 glông jơlan rơdêh đuăi, rơnoh đuăi tui hơdră dăp mơ̆ng 80-100km sa mông. Ƀơi jơlan hmâo 9 anih găn jơlan, pơhlôm hluh gah hăng hơdôm ară jơlan pơkon, anih phun bơwih ƀong, bôh thâo đưm, bruă kơđi čar gêh gal. Rơngiao kơ anun, glông jơlan đuăi hmar pơkă hlâo pơkra 60 bôh tơdrông tua phun hăng dlông, 10 bôh tơdrông tua găn hăng 3 bôh jơlan luh.

Mơ̆ng tơlơi ba tơbiă mơ̆ng 2 bôh tơring čar, phrâo anai, Ding jum man pơdŏng hmâo tơlơi pơsit jao kơ Grŭp wai lăng rơwang bruă 85 grŭp čih tơlơi lăi pơthâo glăi kơsem min bruă dưi ngă Rơwang bruă tuh pơplai pơkra jơlan đuăi hmar Quảng Ngãi - Kon Tum. Grŭp wai lăng rơwang bruă 85 gơgrong mă bruă hăng hơdôm bôh ƀirô, anom bruă bơdjơ̆ nao pioh tŭ mă abih bang hơdôm bôh tơhnal kơsem min hmâo ngă laih pioh kơsem min dong, čih tơlơi lăi pơthâo glăi tơlơi ba tơbiă hơdră pơtrun tuh pơplai rơwang bruă, bĕ bơrơkua, ngă rơngiă đôč.

Ông Đàm Phúc Tuyên – Kơ-iăng Khua Gơnong bruă man pơdŏng tơring čar Kon Tum, brơi thâo: rơwang bruă jơlan đuăi hmar Quảng Ngãi - Kon Tum, kơnong kơ bruă pơsir lŏn pioh man pơdŏng him lăng prăk mă yua rơbêh kơ 1.200 klai prăk. Dua tơring čar pơkôl amra pơpha djop prăk pioh pơsir lŏn mă yua pơkra, jao kơ bruă pơkra jơlan amăng thun 2026. Gah tơring čar Kon Tum prăp lui năng ai ñu 650 klai prăk kơ bruă pơsir lŏn mă yua. Mă tŭ tơlơi găn rơgao mơ̆ng hơdôm rơwang bruă pơkon, tơring čar hmâo him lăng hlâo hơdôm tơlơi tơnap pioh gơgrong hlâo hơdôm jơlan gah pơsir lŏn mă yua pơkra jơlan.

Ông Đàm Phúc Tuyên brơi thâo: Bruă pơkra jơlan đuăi hmar Quảng Ngãi - Kon Tum ƀu kơnong kơ ngă jê̆ giăm, pơtrut bruă rô nao rai sĭ mơdrô ôh mơ̆, ñu dô̆ jing pran hrĭ prong pioh Măng Đen pơplih phrâo amăng pơđĭ kyar tuai čuă ngui. Tơdah jơlan đuăi hmar dưi tuh pơplai tañ, amra ngă brơi Măng Đen jing anih phun tuai čuă lăng glai klô mơ̆ng Dap Kơdư, hrŏm hăng anun, djru Kon Tum hăng Quảng Ngãi jing anih bơngač bơwih ƀong mơ̆ng kual Tŏng Krah – Dap Kơdư.

Hrŏm hăng anun, jơlan đuăi hmar Quảng Ngãi - Kon Tum dô̆ djru pơjing glông jơlan nao rai hluh gah ha amăng plĕ, sir akô̆ tlôn hăng jơlan đuăi hmar dŏng găn jơlan Ngŏ – Yŭ tô nao rai hăng jơlan đuăi hmar Kơdư – Dơnung dêh čar; djru plai ƀiă prăk apah dŭ pơgiăng hăng ba gơnam mơ̆ng hnal kyâo, phun jrao, kơ su, mắc ca, kơphê truh tơdrun tum păn ia rơsĭ Dung Quất gêh gal. Biă ñu, jơlan anai dô̆ djru klă kơ bruă pơdŏng hăng pơgang Lŏn ia, hăng tơring čar Quảng Ngãi, Kon Tum hăng kual Dap Kơdư, kual kơtuai hang ia rơsĭ Tŏng krah ăt kah hăng tô nao rai kual čơlah klâo pơđĭ kyar Việt Nam – Lao – Kur./.