Amăng 2 rơnuk blah ayăt Prang hăng Mi, Sang phơ̆t Ô Chumaram Prếk Chếk, să Vĩnh Quới, plơi prong Ngã Năm jing anih rông dop lu mơnuih mă bruă ngă hơkrŭ. Sang phơ̆t hmâo lu wot hmâo ayăt brơi rơdêh pôr plĕ ƀom, pơ-anah phă. Ră anai, sang phơt Ô Chumaram Prếk Chếk jing gŏng jơlan kơ gru grua hur har mơ̆ng ling tơhan hăng mơnuih ƀôn sang Sóc Trăng. Hơdôm hrơi rơgao, tơring čar Sóc Trăng hmâo laih lu hơdră bruă tuh pơplai, pơkra glăi, djru pơgang, ngă tui hăng gru grua nua yôm anai. Sang phơ̆t ăt dưi dưm dăp lĕ gru grua bôh thâo đưm gưl tơring čar amăng thun 2008. Đại đức Sơn Phước Lợi, git gai Sang phơ̆t Ô Chumaram Prếk Chếk brơi thâo:

“Gong gai ƀơi anai, gưl plơi prong hăng gưl tơring čar đing nao pơdŏng glăi sang phơ̆t. Tơring čar djru rơbêh 1 klai prăk, amăng anun ƀing ơi phơ̆t ăt pơsur mơn neh wa amăng plơi pla hăng ƀing tui đăo phơ̆t ƀơi lu anih djru pơčruh mut dong”.

Nao pơ̆ să Vĩnh Quới amăng hơdôm hrơi anai, lăp ƀuh djă pioh kơ tơlơi pơplih phrâo mơ̆ng sa kual plơi pla tơnap tap hlâo adih, ră anai dưi pơsit plơi pla phrâo tui tơhnal pơkă phrâo. Anom mă bruă amăng plơi pla dưi pơkra ha amăng plĕ, jơlan nao rai tô mơ̆ng să nao pơ̆ hơdôm plơi pla hăng hơdôm anih anom pơkon. Hơdôm ară jơlan dô̆ dưi dưm truă apui pơčrang rơđah amăng bơnga pla klă hiam; sang hră, sang ia jrao, sang jơnum bôh thâo đưm dưi pơkra glăi klă hiam. Mơ̆ng anun, ngă brơi tơlơi hơdip mơda gơnam tam, pran jua mơ̆ng mơnuih ƀôn sang ƀu pơdơi dưi pơđĭ dlông, pơhrui glăi hơnong ñu hmâo lơm sa akô̆ mơnuih 73 klăk prăk sa thun, mrô mơnuih ƀun rin lăng mơ̆ng lu bơnah hrŏ trun dô̆ 2,39%.

Ơi Lâm Ở, mơnuih ƀôn sang ƀơi să Vĩnh Quới lăi pơthâo, hăng hơdôm bôh hnoh ia, măi bô̆p ia pơhlôm akô̆ tlôn djru bruă đang hmua ba glăi bôh tơhnal prong.

“Ră anai bruă ngă hmua pơdai gêh gal lu biă, yua kơ Vĩnh Quới ră anai hmâo akô̆ kli pơgang pơhlôm, hmâo anih ƀô̆p ia, pơdai hmâo nua, sĭ ăt amuñ mơn, djuai pơčeh yua ăt klă hloh mơn. Ră anai bruă ngă đang hmua biă ñu hăng măi mok anun mơnuih ƀôn sang mă bruă gêh gal hloh, ƀu hmâo mă bruă gêh tơnap gah hăng hlâo adih dong tah”.

Amăng hơdôm thun rơgao, tơring čar Sóc Trăng đing nao črâo ba hơdôm gơnong bruă, hơdôm gưl pok pơhai hmao tlôn hơdôm hơdră bruă djuai ania, đing nao ngă tui khut khăt hơdôm jơlan hơdră, rơwang bruă pơtrut pơđĭ kyar bơwih ƀong – mơnuih mơnam kual neh wa djuai ania Khmer. Kơnang kơ anun, bruă bơwih ƀong – mơnuih mơnam kual neh wa djuai ania ƀiă hmâo yak pơđĭ kyar dong, tơlơi hơdip mơda gơnam tam, pran jua dưi đing nao, hơdôm bruă ia jrao, pơtô pơhrăm, bôh thâo đưm, mơnuih mơnam hmâo lu tơlơi pơplih klă

Châu Thành lĕ tơring glông hmâo giăm truh ha mơkrah mrô mơnuih ƀôn sang djuai ania Khmer. Ră anai tơlơi hơdip mơda neh wa ƀu pơdơi pơđĭ kyar. Hăng tơring glông amra kơtang gah bruă đang hmua, pioh pơđĭ prăk pơhrui glăi kơ mơnuih ƀôn sang, Châu Thành đing nao pơtrut kơtang bruă ngă đang hmua tui jơlan gah pơđĭ nua gơnam hăng pơđĭ kyar kơjăp. Lu hơdră ba glăi bôh tơhnal dưi pơjing, kah hăng tơmun pla hăng dlông ia, pla bôh jơman yuan, pla añăm amăng sang păng rưng, ... hơdôm hơdră rông hlô tui hơdră phrâo pơhlôm akô̆ tlôn... Kơnang kơ anun, nua gơnam hơnong ñu hmâo 152 klăk prăk 1 ektar thun 2023; pơhrui glăi gơnong ñu sa akô̆ mơnuih kual plơi pla hmâo giăm truh 61 klăk prăk.

Ơi Nguyễn Văn Mỹ, Kơ-iăng Khua Jơnum min mơnuih ƀôn sang tơring glông Châu Thành, brơi thâo, tơdơi kơ lu thun hrưn đĭ, rơnuč thun hlâo, tơring glông hmâo tŭ yap djơ̆ hăng plơi pla phrâo. Biă ñu, mrô sang anô̆ ƀun rin hăng ƀun rin ƀơƀiă hrŏ trun kơnong kơ dô̆ 3%

“Tơring glông hmâo đing nao iâo pơhrui hơdôm ngăn rơnoh, blung hlâo lĕ mơ̆ng hơdôm jơlan hơdră rơwang bruă, amăng anun, hmâo hơdôm jơlan hơdră kơ plơi pla phrâo, jơlan hơdră kơ djuai ania ƀiă, hluai tui 2 jơlan hơdră anai hmâo djru gum kah hăng pơdŏng anom mă bruă ƀơi plơi pla, djru neh wa ngă tui pơčeh pla, gơnam mă yua, ngă tui hơdôm hơdră ngă đang hmua, laih anun djru brơi neh wa hơdôm hơdră bruă hrŏ trun ƀun rin, djru brơi neh wa hră pơgang gah ia jrao, pơtô pơhrăm, hơdră bruă hmâo ngă tui ba glăi bôh tơhnal hmâo djru prong biă kơ neh wa hrưn đĭ gơgrong hlâo tơlaih mơ̆ng ƀun rin ăt lĕ sa amăng hơdôm mơta tơlơi rơđah mơ̆ng tơring glông”.

Hăng pran pơsit prong mơ̆ng tơring glông hăng pran jua hrưn đĭ mơ̆ng mơnuih ƀôn sang, ƀô̆ mơta tơring čar Sóc Trăng, biă ñu kual neh wa djuai ania Khmer glăk amăng ƀrư̆ pơplih pô, mut hrŏm hăng tơlơi hơdip mơda phrâo mơ̆ng plơi pla, lŏn ia ră anai./.