Ơi Huỳnh Đảm, Khua hơđăp Jơnum min djop djuai ania mơnuih mơnam Việt Nam lăi nao kơ tal blah dưi bơyan phang thun 1975 hăng pran jua mơak biă mă, ñu lăi yua tơlơi git gai djơ̆ lăp, tong ten mơ̆ng Ping gah, Wa Hồ, laih anun tơbiă rai mơ̆ng tơlơi kơtang ling tơhan mơnuih ƀôn sang Việt Nam khin hơtai, mơ̆ng tơlơi kơtang gum pơgôp pran jua djuai ania. Lơ̆m anun, abih bang amăng djuai ania thâo gum pơgôp, mơ̆ng Kơdư truh pơ Dơnung, pơ anăp tơdron blah jak iâu lĕ gah klôn djru ba, gah klôn glăi iâu glăi, ƀing pơ anăp ăt djru hrŏm kah pơpha apui tơneh, pơjeh pơdai, pơdjuai tơlơi khin hơtai kiăng pơklaih rơngai djuai ania. Yua kơ tơlơi anun yơh, jing sa pran kơtang mơ̆ng abih bang djuai ania laih anun ƀuh rơđah tơlơi kơtang mơ̆ng pran jua thâo gum pơgôp ling tơhan hăng mơnuih ƀôn sang. Tui hăng ơi Huỳnh Đảm, pran jua tơlơi gum pơgôp ling tơhan hăng mơnuih ƀôn sang anai hơmâo pơjing rai kơnôl hơdip, bơtơpư̆ kơtang amăng tal kơsung blah djă anăn Hồ Chí Minh:

“Lơ̆m khul ling tơhan blah phun “Kơsung nao hmar”, lu tơhan pơkŏn rŭi tui klôn, sua mă, blah pơrai djop tơhnal či đam nao ƀing ayăt kơnuk kơna Sài Gòn-Gia Định, hlăk anun mơnuih ƀôn sang Sài Gòn-Gia Định ăt tơgŭ hơkrŭ mut tơma sa pran jua kiăng sua glăi rim črăn jơlan, ƀut plơi pla, tơgŭ blah ƀơi djop tơring. Akhăn gru bơnga, pơnăng čih pôr pơthâo čơkă khul ling tơhan blah dưi, glăi pơ plơi prong laih anun djru hrŏm pơgang tơlơi rơnuk rơnua, boh tơhnal bruă hơkrŭ dơ̆ng mơ̆ng mông mơnit blung a phrâo rơngai mơ̆ng tơlơi blah sua dưi hĭ hlăk anun”.

Trung tướng, Kơ-iăng nai tha prin, nai prin tha ơi Trần Vi Dân, Khua anom bruă boh thâo ia rơgơi, Bruă ngă yom hăng Gru phun čih pioh gah kông an, Ding jum kông an brơi thâo, bruă mă akŏ pơdong hăng djă pioh tơlơi đăo kơnang amăng pran jua ană plơi, akŏ pơdong tơdron blah amăng pran jua ană plơi dưi hơmâo Ping gah dưm mrô sa hăng đing nao hlâo hloh. Ping gah ta git gai pioh man pơdong, pơbŭ đĭ pran jua ai hơtai blah ngă hrŏm mơ̆ng abih bang mơnuih ƀôn sang kiăo tui tơlơi pơtô djơ̆, bruă mă tơpă “Ƀu hơmâo anŏ hơgĕt yom hloh kơ tơlơi rơngai mơai pô lŏn ia”. Tơlơi kiăng anun hăng tơlơi pơtô djơ̆ amăng pran jua ană plơi, jing hĭ pran kơtang pơtum abih bang khom blah dưi pơrai abih ƀing ayăt sua lŏn ia.

Kơnang kơ anŏ pơgang hơđong pran jua ană plơi pla, iâu pơtum glăi ană plơi, Ping gah hơmâo đing nao akŏ pơdong, git gai, pơčrâo bruă brơi akŏ pơjing tơdron blah amăng pran jua ană plơi kơjăp phik, amăng anun tơlơi gơgrong ba pơklaih rơngai hăng ƀing ling tơhan pơgang rơnuk rơnua kual dơnung, Trung tướng ơi Trần Vi Dân lăi pơtong, tơlơi hrăm kơ bruă “djă pioh pran jua ană plơi hăng akŏ pơdong tơdron blah amăng pran jua ană plơi dŏ hơnơ̆ng rơnoh yom” amăng rơnuk phrâo ră anai:

“Ƀing gơmơi ƀuh sa tơlơi hrăm kơ bruă pơgang pran jua ană plơi hăng akŏ pơdong tơdron blah amăng pran jua ană plơi yom na nao đôč. Laih anun ñu djru kơ ta pok lu jơlan ngă bruă, pơtrut pran jua, pơsur ană plơi pla ngă tui sa hơnơ̆ng, đăo kơnang laih anun jơlan hơdră, tơlơi pơtrun mơ̆ng Ping gah, tơlơi phiăn kơnuk kơna khom ngă tui djơ̆. Hăng bruă pơphun jak iâu, pơtum, pơčrâo bruă, git gai djơ̆ găl pioh akŏ pơdong pran jua kơjăp amăng plơi pla, djru hrŏm pơgang lŏn ia amăng rơnuk phrâo, rơnuk pơđĭ kyar hrưn đĭ mơ̆ng djuai ania Việt Nam”.

Thượng tướng Trịnh Văn Quyết, Ding kơna khul git gai ping gah, ding kơna anom bruă ping gah ling tơhan dêh čar, Khua anom bruă kơđi čar ling tơhan mơnuih ƀôn sang Việt Nam, amăng tơlơi đĭ pơhiăp lăi pơthâo amăng mông jơnum “Blah dưi bơyan phang thun 1975 hăng rơnuk phrâo pơđĭ kyar mơ̆ng djuai ania Việt Nam”, pơphun mơguah lơ 19/4 phrâo anai lăi pơtong: Blah dưi mơ̆ng tal kơsung blah prong hăng tơgŭ hơkrŭ bơyan phang thun 1975 lĕ sa amăng hơdôm bơnah čih pioh amăng gru phun hing ang laih anun kơtang hloh amăng tơlơi čih glăi gru phun tơlơi pơmin ia rơgơi Việt Nam, jing tơlơi pơgôp hrŏm mơ̆ng gru grua khăp kơ lŏn ia tong ten hăng tơlơi pơmin kiăng pơlir lŏn ia truh kih jing sa laih anun tơlơi kiăng rơnuk rơnua sit nik anun yơh anŏ pơtum pran kơtang gum pơgôp djuai ania hăng pran kơtang amăng rơnuk phrâo laih anun tơlơi gum pơgôp hăng jar kmar.

Blah dưi bơyan phang thun 1975 dŏ jing boh tŭ yua ba gru rơđah ba mơtam mơ̆ng bruă ngă pơklaih rơngai djuai aia rơnuk thun XX, pơgôp hrŏm yom biă mă amăng bruă hơkrŭ ană mơnuih yua tơlơi thâo rơgơi, anăp nao rơngai, rơnuk rơnua, mơnuih ƀôn sang ngă pô hăng mơnuih mơnam thâo rơgơi; pơtrut pơsur pran jua djuai ania pơklaih mơ̆ng tơlơi arăng kơtư̆ juă, tơgŭ hơkrŭ, pok jơlan phă pơrai tơlơi git gai mơ̆ng ƀing pơdrong ngă po kơtư̆ juă phrâo amăng rŏng lŏn tơnah. Thượng tướng ơi Trịnh Văn Quyết lăi:

“Ngă tui tơlơi jak iâu mơ̆ng Ping gah hăng Khua mir sir Hồ Chí Minh, abih bang djuai ania Việt Nam pơjing sa khul kơjăp phik, tŭ ư sa pran jua tơlơi pơmin, pran jua hăng bruă ngă; gum pơgôp amăng ping gah, gum pơgôp abih bang mơnuih ƀôn sang, ling tơhan, gum pơgôp kual Kơdư hăng Dơnung kiăng yak rơbat găn rơgao hĭ tơlơi tơnap tap, amra tơgŭ blah hăng pơsăn drơi jăn, kiăng blah pơrai djop mơta jơlan hơdră, mơneč blah ngă mơ̆ng ƀing ayăt Mi sua lŏn ia hăng gong gai kơnuk kơna ngă kơnuă kơ Mi”.

Blah dưi bơyan phang thun 1975 jing anŏ bơngač na nao amăng gru phun čih pioh bruă hơkrŭ kơ lŏn ia hăng pơgang dêh čar mơ̆ng djuai ania Việt Nam lăi hrŏm, gru phun hơkrŭ Việt Nam hnun mơ̆n. Hơdôm rơnoh yom čih pioh amăng gru phun, tơlơi hrăm mơ̆ng Blah dưi bơyan phang thun 1975, hơmâo djă pioh, hlăk pơđĭ tui hăng amra pơlar hloh kơ djop rơnuk tŏ tui kơñ pơgi ni anăp, ngă pơđĭ tui lu bơnah čih hră plơ̆ng tong ten kơ djuai ania ta yak nao amăng rơnuk phrâo ră anai.