Tơdơi kơ anun, dua gơñu hmâo bơkơtuai laih. Dua bơnah pơtŏng sit, tơlơi rô nao rai phara ha jăn Việt – Lao jing kông ngăn yôm pơphăn yua kơ hơdôm rơnuk nao hlâo akô̆ pơjing kơjăp, khom dưi djă pioh hăng ngă tui. Khua mir sir ơi Lương Cường pơsit yôm hơdôm bôh tơhnal pơđĭ kyar mơ̆ng Lao, pơtŏng sit Việt Nam amra dŏng yua na nao kơ Lao amăng mut hrŏm jar kơmar hăng pơđĭ kyar bơwih ƀong rơngai, gơgrong pô.

Dua gơñu tŭ ư prong khom ĕp hơdră phrâo, hmâo tơhnal pơplih phrâo pioh pơđĭ dlông bôh tơhnal gum hrŏm bơwih ƀong, bôh thâo đưm, kơsem min bôh thâo phrâo-măi mok hluai tui ngă tui lu tơhnal gal hăng pran kơtang mơ̆ng rim dêh čar, amăng anun kơtưn tô nao rai kơtang bruă bơwih ƀong, anom mă bruă, ngăn drăp – prăk kak, tuai čuă ngui dua bôh dêh čar; pok pơhai hơdôm bruă mă ba glăi bôh tơhnal pioh hrưn đĭ pơhrui glăi prăk mơ̆ng gơnam sĭ kơ dêh čar tač rơngiao hmâo 5 klai dolar Mi amăng hơdôm thun pơ̆ anăp./.