Tơlơi lăi pơthâo amăng mông mă bruă brơi ƀuh, Dak Lak glăk bưp lu tơnap tap amăng bruă dưm dăp, kah pơpha hăng jao prăk tuh pơ alin brơi hơdôm jơlan hơdră tui hơnong pơkă dêh čar. Sa, dua Jơlan hơdră pok pơhai kaih yua gun găn lơm ră anai gơnong glông ăt jao prăk kak hăng mă yua prăk kak thun 2025 brơi tơring čar.

Amăng mông mă bruă, Khua pơ ala mơnuih ƀôn sang ăt rơkâo hơdôm boh tơhnal bơdjơ̆ nao bruă ngă hmua hăng ayuh hyiăng lŏn mơnai anun lĕ bruă wai lăng, mă yua lŏn mơnai, ngă đang glai; tơlơi gun kơplah wah tơlơi pơkă amăng tơlơi phiăn đang hmua, tơlơi phiăn lŏn mơnai kơ bruă yua apah lŏn glai, pơkă nua glai rưng…Bruă pok pơhai ngă hră pơ-ar črâo ba tuh pơ alin, pơđut hĭ ngă pơkôl ngă tui akŏ bruă pơđĭ kyar sang dŏ; hơdră čan prăk brơi sang anŏ giăm ƀun rin, sang anŏ phrâo pơklaih mơng ƀun rin djru čan prăk bơdjơ̆ nao lŏn dŏ, sang dŏ, lŏn ngă hmua, pơplih bruă mă.