Tui tơlơi sit nik ƀơi hơdôm boh ƀon lan brơi ƀuh, mơnuih ƀôn sang, sit biă ñu lĕ mơnuih djuai ania ƀiă, tŭ ư, dong yua hăng čang rơmang nao tơlơi pơplih phrâo tơdơi kơ pơmut hrŏm. Ơi Y Rul Niê, dŏ amăng ƀuôn Pốt A, tơring glông Cư̆ Mgar brơi thâo: “Mah đuăi nao rai tơnap tap ƀiă, samơ̆ ƀing apăn bruă kiăng thâo mă bruă, gir run amra pơgiong bruă jao”. Ƀu djơ̆ kơnong čang rơmang ƀơi gưl să, lu mơnuih ƀôn sang ăt đăo gơnang nao kơ bruă pơmut amra ngă gêh gal pơđĭ kyar pơlir djop kual.

Ayong Huỳnh Trần Minh Đức (plơi prong Buôn Ma Thuột) brơi thâo: “Tơdah Dak Lak pơmut hrŏm Phú Yên, tơlơi bơwih ƀong huă kual ia rơsĭ pơlir hrŏm ngă hmua kual Dap kơdư amra ba glăi tơlơi pơlir kơtang, pơtrut sĭ mơdrô, logistics”. Bruă dưm dăp, pơmut lĕ tơlơi yak nao akŏ phun kiăng ngă hơbot, tŭ yua anih anom mă bruă. Tơlơi mut hrŏm hăng pran đăo gơnang mơng mơnuih ƀôn sang lĕ tơlơi pơtrut kơtang djru brơi gong gai pok pơhai truh kih tơlơi črâo trun anai, pơgôp pơđĭ kyar hơđong kjăp lŏn ia.