Lơ 26/4/1975, tơdơi kơ sa rơwư̆ prăp lui rŭi nao hmar, rơbat rŭ nao rah, kơsung blah hơtun nao pơ anăp kiăng pơklaih rơngai, laih anun iâu pơmut ling tơhan mut ngă hrŏm nao blah ayăt, 5 binh đoàn khul tơhan phun mơ̆ng Ling tơhan pơklaih rơngai lŏn ia, pơpha jing 5 anăp kơsung nao sa amăng plĕ, mut nao pơ plơi prong phun Sài Gòn-Gia Định hlăk anun. Tơhan hơđăp ơi Đoàn Đình Điểu, hơdor glăi; Khul tơhan Sư đoàn bộ binh 968, quân khu 4, tŭ mă bruă jao brơi blah pơrai anih gak mơ̆ng glăi mơ̆ng ayăt či Đồng Dù, tơring glông Củ Chi, ngă anŏ gêh găl brơi tơhan ta kơsung nao blah mut hlom bom amăng Sài Gòn. Lơ 29/4, ƀu hŭi kơ phao kơtuang boh ƀôm pơtuh mơ̆ng ayăt pơnah hăng plĕ trun, hăng pran jua khut khăt djai drơi pô, kiăng pơklaih lŏn ia, ñu hăng ƀing gơ̆p kơsung nao hlâo, blah pok jơlan:

“Abih bang amăng Sư đoàn 968 gơmơi hmư̆ hiăp tơlơi pơtrun brơi pok 4 jơlan kơsung blah; gah yŭ, Yŭ dơnung, gah ngŏ, gah kơdư. Ƀing gơmơi rŭi nao, sa khul tơhan đại đội gơmơi nao tơl anih klơi luh, klơi amăng, yua pơ anun ƀu hơmâo glai kyâo ôh, gah klôn lĕ đang kơsu, pơ anăp lĕ hmua dơnao soh....Ƀing gơmơi khom mut nao klâo wơ̆t kah dưi pok jơlan kơsung blah prong.

Hơdor glăi hrơi blan blan ngă đưm lơ̆m rơdêh sar 390 tul bơrơbuh bah amăng Dinh Độc Lập, tơhan hơđăp Ngô Sỹ Nguyên, pô pơnah kơnong rơdêh sar 390 brơi thâo:

“Ngă hơkrŭ ƀudah tơlơi kơsung blah djă anăn Hồ Chí Minh ječ ameč hơdeč hmar, ba glăi boh than prong biă mă. Gah jơlan anăp nao pơ ngŏ, khul tơhan mrô 2 mơ̆ng gơmơi hơmâo 2 boh rơdêh sar tañ truh hloh anun lĕ 843 hăng 390, jing 2 boh rơdêh mơ̆ng khua grup Bùi Quang Thận, hăng pô apăn bruă kơđi čar Vũ Đăng Toàn. Rơdêh sar 390 mơ̆ng gơmơi đuăi hmar kơtang kơtit, tul bah măng mut nao pơ Dinh Độc Lập, pơ pơƀuh pran kơtang mơ̆ng ling tơhan Việt Nam blah prai sa gong gai hơđăp, pơ ala brơi kơ pran jua kơtưn kiăng rơnuk rơnua mơ̆ng djuai ania Việt Nam. 21 thun glêh tơnap djai drơi pô kah mơ̆ng dưi hơmâo mơnit mông mơ-ak tui anai”. 

Amăng hrơi  hơdor glăi “Lŏn ia dưi lir hơbit truh kih”, ơi Hồ Việt Hà, dŏ ƀơi kuân Long Biên, Hà Nội pơhưc pran jua čăng glăi:

“Kâo rai pơ anai amăng pran jua phưč phưč mơtam hơdor glăi lơ 30/4, hơdor glăi 50 thun blah dưi pơklaih rơngai Sài Gòn. Drơi jăn kâo prŏ tơdăm prăm dra găn rơgao amăng rơnuk blah ayăt Mi, tơdơi anai blah ngă pơgang guai dêh čar pơ Kơdư, hăng pơ Dơnung. Mông anai hơdor glăi, pran jua kâo ol kơdol kiăng hia ƀlĕ ia mơta. Kâo pơmin glăi rơnoh yom pơblang brơi sa boh pia: Yua hơgĕt Pinggah hăng wa Hô git gai lŏn ia ta găn rơgao rơnuk blah Prang, blah Mi hăng mơnuih ƀôn sang mơ̆ng kual Kơdư, truh pơ Dơnung, lêng kơ anăp nao kiăng pơklaih rơngai lŏn ia hiư̆m pă”.

Kơ hrơi kơsung blah mơ̆ng Khul tơhan amăng hrơi blah ngă Hồ Chí Minh hing ang đưm hlâo, Đại tướng Phạm Văn Trà, Khua hơđăp ding jum ling tơhan, brơi thâo, Gơnong dlông ngă bruă hơdeč, khut khăt git gai črâo ba 5 jơlan kơsung blah. Hrŏm hăng pran kơtang gah ling tơhan, kơđi čar, bruă iâu pơthưr mơnuih ƀôn sang, iâu pơthưr ƀing ayăt hơmâo lu anŏ lăp djơ̆ mơn, ngă kơ tơhan pơčlah đuăi abih.

“Ƀing ta pơklaih rơngai kual Dơnung abih bang, kơnang kơ pran kơtang mơ̆ng abih bang mơnuih ƀôn sang hăng pran kơtang mơ̆ng 3 hơdră kơsung blah, phun ñu lĕ gah ling tơhan. Anai jing tơlơi git gai mơ̆ng Ping gah, mơ̆ng Ding jum kơđi čar rơgơi biă mă. Tơlơi git gai tơpă sit dong lĕ hlâo kơ anun lơ̆m Khul tơhan mrô 4 ƀu dưi mut nao pơ Dinh Độc Lập yua glăk tơnap pơ Xuân Lộc jing git gai Khul tơhan mrô 2 găn ia krông Đồng Nai mut nao hlao. Tơdơi kơ Dương Văn Minh lăi pơthâo gơñu ƀu anăm blah dong tah, abih bang mơnuih ƀôn sang kual Dơnung tơgŭ mă pô hrŏm hăng tơhan blah ngă mut nao pơklaih rơngai hơdôm kual plơi pla. Tơlơi git gai mơ̆ng Ping gah ƀơi 3 bơnah kơsung blah anun lĕ tơhan - kơđi čar - iâu pơthưr mơnuih ƀôn sang, iâu pơthưr ayăt roh, abih bang tui anun mơ̆ ƀing ta dưi pơklaih rơngai kual Dơnung, pơlir lŏn ia jing sa”.