Pơhiăp ƀơi mông jơnum, Khua mir sir ơi Lương Cường lăng yom tơlơi pơgôp hiăp, pơdah rai tơlơi gơgrong ba, pran jua hur har hăng bruă pơđĭ kyar hing ang lŏn ia laih anun hơđong kơjăp dêh čar. Lu tơlơi pơgôp hiăp pơdah rai hok mơak ƀơi anăp kơ tơlơi pơtrun khut khăt kah hăng bruă hơkrŭ prong mơ̆ng gơnong dlông; bruă ngă hrŏm kơjăp, sa pran jua amăng glông bruă kơđi čar, mơ̆ng ƀing ngă bruă sĭ mơdrô hăng djop gưl mơnuih ƀôn sang hơmâo pơgôp hrŏm ba glăi boh tơhnal amăng tơlơi bơwih ƀong huă, mơnuih mơnam, pơgang lŏn ia, rơnuk rơnua amăng ƀôn prong hăng dêh čar. Laih dơ̆ng, mơnuih ruah khua ăt rơkâo hơdôm tơlơi aka ƀu djơ̆ amăng bruă mă hơmâo sit nik hơdip mơda rim hrơi kiăng pơsir hĭ tañ.

Amăng mơguah lĕ, ƀơi anih gru grua dêh čar Ngã Ba Giồng, să Xuân Thới Thượng, tơring glông Hóc Môn, Khua mir sir ơi Lương Cường nao dưm guang bơnga, čuh ñang h’ŭ hơdor tơngia prong prin kơ Khua mir sir Hồ Chí Minh laih anun hơdor tơngia kơ ƀing khua mua hơđăp ping gah, kơnuk kơna, ƀing ngă bruă hơkrŭ dêh čar, ƀing tơhan djai pơsăn drơi jăn yua kơ lŏn ia, mơnuih ƀôn sang rơbuh đih ƀơi tơdron blah, yua kơ kiăng lŏn ia rơngai, ană plơi pla hyuk hyak mơak klă kah hăng ră anai.